ÍR-ingar hafa ákveðið að hætta við það að senda ekki kvennalið til leiks í keppni í handbolta á næstu leiktíð. Þetta kemur fram í tilkynningu á facebook-síðu Breiðholtsfélagsins.

Þar kemur enn fremur fram að Finnbogi Grétar Sigurbjörnsson fyrrverandi þjálfari íslenska kvennalandsliðsins hafi verið ráðinn þjálfari liðsins.

Félagið kynnti áform sín um að leggja kvennaliðið niður tímabundið í síðasta mánuði en var að liður í því að bregðast við fjárhagserfiðleikum hjá handboltadeild félagsins.

Sú ákvörðun mældist illa fyrir bæði hjá ÍR-ingum sem og í handboltasamfélaginu öllu og eftir að það var tilkynnt hefur mikill kraftur vaknað í Breiðholti og fjöldi fólks lýst sig reiðubúið til að aðstoða við endurreisn kvennastarfsins.

Komið hefur verið á nýju meistaraflokksráði kvenna undir forystu Matthíasar Imsland þar sem tugir einstaklinga hafa tekið að sér mismunandi verkefni.

„Ætlunin er að byggja upp meistaraflokk á þeim ungu og efnilegum leikmönnum sem félagið hefur yfir að ráða. Ég tel að þessir leikmenn verði góðar fyrirmyndir annarra iðkenda félagsins í umhverfi sem ég vonast til að verð eftirsóknarvert að spila í. Ég hlakka mjög til tímabilsins,” segir Margrét Valdimarsdóttir leikmaður ÍR.