ÍBV styrkti stöðu sína í sjötta sæti Olís-deildar karla í kvöld með 31-27 sigri á Akureyri þegar liðin mættust loksins tveimur vikum eftir að leikurinn átti upprunlega að fara fram.

Þetta var fjórða dagsetningin sem var reynt að láta liðin mætast eftir að fresta þurfti leiknum í þrígang. Fóru Akureyringar því snemma til Eyja.

Það virtist gera þeim vel því Akureyri byrjaði leikinn vel og var með forskotið þegar liðin gengu til búningsklefanna í hálfleik. Í seinni hálfleik snerist leikurinn við því ÍBV komst yfir á upphafsmínútum. 

Staðan var jöfn þegar fimm mínútur voru til leiksloka, 25-25 en ÍBV kláraði leikinn á 6-2 spretti sem innsiglaði sigur Eyjamanna.

Hákon Daði Styrmisson fór á kostum í liði ÍBV með ellefu mörk í tólf skotum, hjá gestunum voru Leonid Mykhailiutenko og Hafþór Vignisson atkvæðamestir með sex mörk hvor.