Sautjándu umferð í Olís-deild karla lýkur loksins á morgun þegar ÍBV tekur á móti Akureyri, tæpum tveimur vikum eftir að leikurinn átti upprunlega að fara fram en honum var þrisvar frestað vegna samgönguörðugleika.

Liðin áttu að mætast 28. febrúar en þeim leik var frestað um sólarhring. Samgönguörðugleikar gerðu það að verkum að ekki var hægt að leika daginn eftir og var því aftur frestað.

HSÍ tók ákvörðun í gær um að fresta leiknum í þriðja sinn vegna stormviðvörunar á Íslandi og varð því ekkert úr því að liðin mættust í kvöld.

Samkvæmt tilkynningu sem HSÍ sendi frá sér í dag ferðast Akureyringar til Eyja í kvöld með Herjólfi og er því ekkert til fyrirstöðu að liðin mætist annað kvöld.