„Þetta eru ekki aðeins frábær tíðindi fyrir Val heldur einnig íslenskan körfubolta að fá að njóta Jóns í eitt ár hið minnsta í viðbót,“ sagði Svali Björgvinsson, formaður körfuboltadeildar Vals, um leið og hann handsalaði samning við Jón Arnór Stefánsson.

Jón þarf vart að kynna. Hann er einn besti körfuboltamaður sem Ísland hefur alið og var valinn íþróttamaður ársins árið 2014. Hann hefur orðið Íslandsmeistari fimm sinnum og einu sinni bikarmeistari með KR. Á löngum atvinnumannsferli vann hann Evrópudeildina með rússneska liðinu Dynamo St. Pétursborg og á Ítalíu vann hann bikarmeistaratitil með Napoli. Samkvæmt vefsíðu KKÍ spilaði hann 459 leiki í atvinnumennsku og skoraði 7,2 stig að meðaltali í leik.

„Þegar svona ákvörðun er tekin þá kvíðir maður svolítið fyrir aðeins áður, en þegar hún hefur verið tekin þá er þetta eins og þetta á að vera,“ segir Jón Arnór. Ákvörðunin að taka slaginn með Val fæddist í sumar þegar Jón og einn af bestu vinum hans, Pavel Ermolinskij, tóku nokkrar æfingar í sumar. Í ræðu Svala sagði að þá hefðu menn farið að ræða saman og athugað áhugann.

Hefur saknað bæði Finns og Pavels og finnur þá í Val

„Ég tók mér góða pásu eftir tímabilið og fór svo aðeins að skjóta með Pavel. Þá fann ég að mig langaði að spila. Ég spurði sjálfan mig hvort ég væri tilbúinn að stoppa og þetta kæmi aldrei aftur. Ég var ekki tilbúinn til þess,“ segir Jón. Hann segir að skrokkurinn sé enn í góðu standi og hann geti varla beðið eftir að byrja að æfa á nýjum stað en Jón hefur verið alla sína tíð í KR.

„Það erfiðasta við þessa ákvörðun var að ímynda sér hvað fólk myndi segja. Um leið og ég náði að losna við þá hugsun, að ég væri að gera þetta fyrir sjálfan mig og væri ekki að gera það sem fólk ætlast til af mér, þá var ég sáttur. Ég er ekkert hræddur við umræðuna. Ég ætla að njóta þess að spila og fá nýja áskorun.

Ég er að fara að spila fyrir Finn sem ég hef saknað mikið og við höfum unnið saman með landsliðinu og KR. Ég elska líka að spila með Pavel. Þetta er ekkert galin ákvörðun þegar hún er skoðuð.

Það eru kynslóðaskipti í KR og það er að þróast í rétta átt. Ég sá ekki sjálfan mig í þeirri mynd núna. Ég er búinn vera lengi og gera allt sem mig langaði að gera og vinna allt. Elska allt fólkið en það var bara kominn tími á eitthvað nýtt.“

Verðum með gott lið

Hann segir að kappið megi ekki bera fegurðina ofurliði nú þegar hann er kominn í Val frá KR sem er auðvitað stórveldi í körfuboltanum eftir titlana undanfarin ár. „Mig langar að vera upptekinn af því að spila en ekki endilega að vinna. Ég hef alveg brennt mig á því og prjónað yfir mig í því. Það er auðvelt að gera það.

Ég er að koma í nýtt umhverfi, Valur er ekki með 12 manna landsliðshóp og við verðum bara að tala hreina íslensku hvað það varðar. Við setjum okkur markmið hægt og rólega. Við verðum með gott lið og munum keppa við hin liðin og frábæran mann í brúnni.

Það á eftir að finna nokkur púsl en það er of snemmt að setja okkur markmið. Það er ekki í umræðunni núna.“

Finnur Freyr Stefánsson, þjálfari Vals, segir það mikið fagnaðarefni að Jón Arnór sé tilbúinn að taka slaginn með Val. „Þær mínútur sem hann mun spila, sem verða margar, mun hann gefa liðinu helling. Ekki síst á æfingagólfinu. Fyrir stráka sem eru hérna fyrir þá er margt hægt að læra af honum.“

Sameinaðir á ný. Jón Arnór og Finnur Freyr munu vinna saman á ný á Hlíðarenda.