Tom Boudeweel, fjölmiðlamaður frá Belgíu, segir að þrátt fyrir að hugmynd um þessa sameiginlega deildarkeppni Belgíu og Hollands í knattspyrnu karla sé komin vel á veg séu enn margar hindranir í veginum sem þarf að yfirstíga áður en hún getur orðið að veruleika.

„Þetta hefur verið þaulrætt í Belgíu í tæpa tvo áratugi án árangurs. Það er engin tilviljun að þessi umræða sé á lofti núna. Club Brugge sem er í ákveðnum sérflokki í Belgíu eins og sakir standa er með langtíma markmið um að komast nær stærstu félögum Evrópu. Félagið skráði sig á hlutabréfamarkað á dögunum og góður árangur liðsins í Meistaradeildinni undanfarin ár hefur gert það að verkum að félagið er á öðrum stað fjárhagslega en önnur lið hérlendis. Fyrir vikið lögðu þeir fram þessa tillögu sem var samþykkt af félögunum í tveimur efstu deildunum,“ segir Tom en lætur þess getið að ekki séu allir á þessu máli.

„Það er ekki samstaða um þetta hjá félögunum í landinu. Ég held að það sé alveg klárt að deildarkeppni án sterkustu liða landsins mun ekki skapa jafn mikla spennu. Þá verður að líta til þess að lið á frönskumælandi svæðum hafa bent á að þau eigi meiri samleið með frönskum liðum en hollenskum.“ segir Tom og bætir við

„Stuðningsmannahópar hafa bent á að með þessu væri gengið gegn sögu félaganna. Einhverjir nágrannaslagir myndu til dæmis mögulega heyra sögunni til. Þar að auki myndi þetta leiða til aukinna ferðalaga stuðningsmanna.“

Meiri spenna fyrir sameiningu í Belgíu

Hollenski umboðsmaðurinn Guyon Philips, sem Fréttablaðið ræddi við, telur að það verði afar erfitt að sannfæra hollensku félögin um að setja deildina á laggirnar en það sé ekki útilokað. Fjárhagslega geti þetta reynst félögum vel.

„Þessi deildarkeppni mun ekki verða að veruleika fyrr en í fyrsta lagi árið 2024 eins og staðan er núna. Fyrirkomulag deildanna er mismunandi í Belgíu og Hollandi og það þarf að komast að samkomulagi um hvaða leið verði farin í þeim efnum. Þá er stór munur að í Belgíu geta félög sem eru ekki atvinnumannafélög farið upp á milli deilda í neðri deildum á meðan það þarf fyrr að gera félög að atvinnumannafélögum í Hollandi. Það er meiri spenna fyrir þessu í Belgíu eins og sakir standa og ég finn fyrir meiri efasemdum í hollensku knattspyrnusamfélagi,“ segir Philips um stöðu mála hvað viðræðurnar varðar.

Guyon tekur undir að fjárhagsleg hlið samkomulagsins hafi ákveðið aðdráttarafl. „Það er alveg rétt að fjárhagslegur ábati af þessu getur orðið töluverður og ég held að það sé langt síðan félög í þessum löndum stóðu jafn illa fjárhagslega vegna kórónaveirufaraldursins. Það er aldrei að vita hvað gerist þegar félögin sjá hvað þau geta fengið út úr þessu fjárhagslega. Það er samt sem áður mín tilfinning núna að íhaldssemin fái að ráða ríkjum í Hollandi og það verði ekki samþykkt að fara þessa leið þar í landi.“

Gæti orðið sjötta sterkasta deildarkeppnin í Evrópu

Stór hluti ástæðunnar fyrir því að belgísk félög eru spennt fyrir sameiginlegri deild er fjárhagslegur. Fjármálafyrirtækið Deloitte telur að þessi deild gæti skilað markaðs- og sjónvarpstekjum upp á 476 milljónir evra á ári. Það er ekki nálægt því sem fimm sterkustu deildirnar skila félögunum þar en minnkar bilið þó umtalsvert. Gangi þessar hugmyndir upp yrði þessi deild líklega sjötta sterkasta deildarkeppni í Evrópu og myndi færa belgísk og hollensk lið nær því að verða aftur samkeppnishæf í Evrópukeppnum félagsliða.

Þörfin fyrir stofnun BeNe Liga er ekki síst sprottin út frá þeirri staðreynd að belgísk og hollensk félög hafa ekki riðið feitum hesti frá Evrópukeppnum félagsliða líkt og félögin gerðu á níunda áratug síðustu aldar og framan af þeim tíunda.

Undanfarna áratugi hafa lið úr sterkustu deildarkeppnum Evrópu, Englandi, Frakklandi, Ítalíu, Spáni og Þýskalandi, verið allsráðandi í keppnum innan UEFA. Sautján ár eru liðin síðan félag utan Englands, Ítalíu, Spánar og Þýskalands vann Meistaradeild Evrópu.

Staðan er aðeins öðruvísi í Evrópudeildinni en þar er Ajax þó eina liðið utan fimm sterkustu deildanna sem hefur komist í úrslit keppninnar síðustu fimm tímabilin. Tíu ár eru liðin frá því að lið utan fimm sterkustu deildanna vann Evrópudeildina síðast en á áratugunum fyrir aldamótin voru reglulega lið frá minni deildum í úrslitaleikjum Evrópukeppni félags- og meistaraliða.