Afleitur sóknarleikur varð íslenska karlalandsliðnu í handbolta að falli er liðið tapaði í kvöld sínum fyrsta leik eftir vonbrigðin sem liðið upplifði á HM. Andstæðingur kvöldsins var Tékkland í undankeppni EM, Tékkarnir voru sterkari og unnu að lokum fimm marka sigur 22-17.
Jafnframt var þetta fyrsti leikur íslenska liðsins eftir starfslok Guðmundar Guðmundssonar, fyrrum landsliðsþjálfara. Ágúst Jóhannsson og Gunnar Magnússon stýrðu íslenska liðinu í kvöld.
Strákarnir okkar skoruðu fyrstu tvö mörk leiksins en í kjölfarið hrökk allt í baklás. Tékkarnir skoruðu sex mörk í röð áður en Ísland svaraði með þremur mörkum. Staðan því 6-5 þegar rétt tæpar átján mínútur höfðu liðið af leiknum.
Björgvin Páll Gústavsson, markvörður Íslands var ljósi punkturinn við liðið í fyrri hálfleik en hann varði sjö skot, það sama og kollegi hans í markinu hjá Tékkum.
Á löngum hluta leiksins gekk sóknarleikur íslenska liðsins erfiðlega. Tékkarnir höfðu að sama skapi svörin í sínum aðgerðum og fóru að lokum með tveggja marka forskot inn til hálfleiks, staðan 12-10.
Erfiðleikar íslenska liðsins héldu áfram í síðari hálfleik, þá helst í sóknarleiknum. Á fyrstu tuttugu mínútum hálfleiksins tókst Strákunum okkar bara að koma boltanum í netið tvisvar sinnum.
Þau mörk skoraði Bjarki Már Elísson en hann leiddi íslenska liðið áfram hvað markaskorun varðar.
Þegar að tíu mínútur eftir lifðu leiks voru heimamenn í Tékklandi sex mörkum yfir 19-12 og verkefnið ærið fyrir íslenska landsliðið.
Strákunum okkar tókst eitthvað að brúa bilið fyrir leikslok, með því að skora fjögur síðustu mörk leiksins, en þó ekki að fullu og þurftu þeir að lokum að sætta sig við fimm marka tap 22-17
Eftir leik kvöldsins situr íslenska liðið í 2.sæti síns riðils, tveimur stigum á eftir toppliði Tékklands sem er með fullt hús stiga eftir fyrstu þrjá leiki sína. Liðin mætast öðru sinni á sunnudaginn, þá í Laugardalshöll.
