Ísland mun þurfa umspil til þess að tryggja sér farseðilinn í lokakeppni Evrópumótsins í knattspyrnu karla en það varð ljóst eftir jafntefli íslenska liðsins á móti Tyrklandi í leik liðanna í Istanbúl í gærkvöldi.

Það var ljóst fyrir leikinn að jafntefli myndi duga Tyrklandi til þess að komast áfram og leikmyndin litaðist töluvert af þeirri staðreynd. Tyrkneska liðið, sem hafði fengið þrjú mörk á sig í undankeppninni fyrir þennan leik, varðist vel og var ávallt hættulegt þegar liðið sótti hratt.

Tvö af mörkunum sem Tyrkland hafði fengið á sig í riðlinum komu í fyrri leik Íslands og Tyrklands á Laugardalsvellinum en þau komu bæði eftir föst leikatriði.

Íslenska liðið tók við sér undir lok leiksins

Það var einmitt eftir eitt slíkt sem Hörður Björgvin Magnússon sem kom inn á sem varamaður í seinni hálfleik fékk langbesta tækifæri Íslands til þess að tryggja íslenska liðinu sigurinn og halda lífinu í voninni um að enda í öðru af tveimur efstu sætum riðilsins fyrir lokaumferðina.

Skalla Harðar Björgvins eftir hnitmiðaða hornspyrnu Gylfa Þórs Sigurðssonar var bjargað á marklínu af tyrkneskum varnarmanni.

Skipulagið sem Erik Hamrén og Freyr Alexandersson, þjálfarar íslenska liðsins, og teymið í kringum liðið hafði gert fyrir leikinn riðlaðist líklega þó nokkuð þegar Alfreð Finnbogason fór meiddur af velli um miðbik fyrri hálfleiks.

Hamrén og Freyr skiptu Arnóri Sigurðssyni inn á en þeir hafa líklega haft Arnór í huga sem varamann fyrir annan leikmann og seinna í leiknum.

Eftir að hafa leikið varfærnislega framan af leiknum fóru leikmenn íslenska liðsins að taka meiri áhættu þegar um það bil hálftími var eftir af leiknum. Það leikplan var nálægt því að ganga upp.

Umspilsleikur fram undan í vetrarkuldanum í mars

Viðar Örn Kjartansson var síðan veikur í gærkvöldi og það fækkaði sóknarmöguleikunum af varamannabekknum ofan á þau meiðsli sem herjuðu á hópinn fyrir landsliðsgluggann.

Það er ljóst að Ísland fer í umspil um laust sæti á Evrópumótinu en þeir leikir fara fram í mars á næsta ári. Eins og staðan er núna verður andstæðingur íslenska liðsins þar Búlgaría, Rúmenía eða Ísrael.

Fari svo að Sviss komist áfram úr D-riðli keppninnar verður andstæðingurinn hins vegar Norður-Írland, Írland eða Slóvakía. Sviss er í þriðja sæti D-riðilsins eins og sakir standa en liðið mætir Georgíu í kvöld og Gíbraltar í lokaumferð riðilsins.

Fari úrslit eftir bókinni í þeim leikjum sem eftir eru í D-riðlinum verður seinni sviðsmyndin raunin í mars.

Næsta verkefni íslenska liðsins er hins vegar að klára riðilinn með sóma en liðið mætir Moldóvu í lokaumferðinni á sunnudaginn kemur.

Alfreð verður fjarri góðu gamni í þeim leik en hann fór úr axlarlið í leiknum í gær. Ekki er ljóst hversu alvarleg meiðsli Arnórs Ingva Traustasonar eru. Arnór Ingvi virtist hafa tognað aftan í læri en hann fór af velli í seinni hálfleik. Þá er spurning hvort Viðar Örn verði búinn að hrista af sér veikindin í tæka tíð fyrir þann leik.

Nú þurfa svo vallarstarfsmenn Laugardalsvallar að fara upp á tærnar og íslenskir knattspyrnuáhugamenn að biðja til veðurguðanna í von um að Laugardalsvöllurinn verði leikfær þegar að umspilinu kemur. Litlar líkur eru á því að bygging Laugardalsvallar verði komin úr undirbúningsnefnd í tæka tíð fyrir þá viðureign.