Hilmar Snær Örvarsson, skíðamaður úr Víkingi, hafnaði í þriðja sæti í svigi á Evrópumótaröð IPC sem fram fór í Liechtenstein í dag en þetta var lokadagur mótaraðarinnar þetta tímabilið.

Hilmar Snær var annar eftir fyrri ferðina en smávægileg mistök í upphafi seinni ferðarinnar reyndust dýr og lauk Hilmar keppni í þriðja sæti. 

Aðstæður í dag voru fremur erfiðar, gott veður en mikið af nýjum og blautum snjó. Sem fyrr var það Frakkinn Arthur Bauchet sem hafði sigur í dag en hann sigraði allar fjórar keppninar í standandi flokki á mótinu hér í Malbun.

Hilmar Snær lýkur þar af leiðandi keppni á Evrópumótaröðinni þetta árið með silfur og brons í svigi en líklegast má telja að þetta hafi verið síðasta verkefni hans þetta tímabilið.