Skíðamaðurinn Hilmar Snær Örvarsson frá skíðadeild Víkings vann í dag til sinna fyrstu gullverðlauna í stórsvigi á alþjóðlegu skíðamóti.

Hilmar Snær var með lokatímann 1:37.23 mínútur og var rúmlega hálfri sekúndu á undan Slóvakanum Martin France sem hafði betur gegn Hilmari í stórsviginu í gær.

Hilmar er staddur í Slóvakíu á Evrópumótaröð Alþjóða Ólympíuhreyfingar fatlaðra (IPC). Með sigrinum í dag varð Hilmar fyrstur Íslendinga til þess að vinna gullverðlaun í stórsvigi á alþjóðlegu alpagreinamóti.

Hann var annar eftir fyrri ferðina í morgun á tímanum 47,30 sekúndum en Hilmar var eini skíðamaðurinn sem fór undir 50 sekúndur í seinni ferðinni er hann kom í mark á 49,93 sekúndum og með heildartímann 1:37,23 mínútur.

Nóg hefur verið að gera hjá Hilmari undanfarið og hefur hann stimplað sig rækilega inn sem einn af sterkustu svigmönnum heims í standandi flokki og er nú á hraðri uppleið upp styrkleikalistann í stórsvigi.

Næstu tvo daga taka við keppnir í svigi hjá Hilmari á þessu móti og svo í lok febrúarmánaðar keppir hann á lokamóti Evrópumótaraðarinnar í Zagreb.