Skíðamaðurinn Hilmar Snær Örvarsson landaði áðan silfurverðlaunum í stórsvigskeppni í Jasná í Slóvakíu en keppnin er hluti af Evrópumótaröð IPC í alpagreinum.

Hilmar var annar eftir fyrri ferð dagsins en hann skíðaði á tímanum 50,36 sekúndum og í seinni ferðinni kom hann í mark á tímanum 51,62 sekúndum með lokatíma upp á 1:41,98 mínútur.

Slóvakinn og heimamaðurinn Martin France fór með nauman sigur af hólmi í keppninni en hann var með lokatímann 1:41,25 mínútur.

Keppt verður í stórsvigi aftur á morgun en á fimmtudag og föstudag verður svo keppt í svigi.