Sveinbjörn Claessen hefur ákveðið að leggja skóna á hilluna eftir þrettán ár með ÍR í körfubolta en þetta staðfestir Sveinbjörn við Morgunblaðið í dag.

Sveinbjörn sem er 32 ára segir í viðtali við Morgunblaðið að gömul hnémeiðsli hafi gert honum erfitt fyrir en Sveinbjörn sleit tvisvar krossband á ferlinum.

Sveinbjörn var hluti af liði ÍR sem vann bikarmeistaratitilinn árið 2007 en hann var í lykilhlutverki hjá liðinu í rúm tíu ár. Lék hann fyrstu leiki sína fyrir ÍR í efstu deild árið 2005.

Var hann ekki í jafn stóru hlutverki og oft áður á þessu tímabili þegar ÍR rétt missti af deildarmeistaratitlinum en féll úr leik gegn Tindastól í undanúrslitum Dominos-deildar karla.

Var þetta annað árið í röð sem ÍR kemst í úrslitakeppnina eftir sex ár sem ÍR komst ekki í úrslitakeppnina.