Spænska lög­reglan hefur sett af stað sér­stakt við­bragð á stöðum sem breskir ferðamenn og fótboltabullur sækja á Kanaríeyjum í tengslum við leik ná­grannanna í Wa­les og Eng­landi á Heims­meistara­mótinu í knatt­spyrnu í kvöld.

Leikið er í Katar á mótinu en vendingar síðustu daga á Kanarí­eyjum, er varðar æstar fót­bolta­bullur, hafa orðið til þess að öryggis­gæsla verður hert til muna.

Kanarí­eyjar eru vin­sæll ferða­manna­staður hjá Bretum sem þrá fátt heitar á þessum árs­tíma en að sóla sig og kæla sig niður til skiptis með ís­köldum á­fengum veigum.

Þá hefur það lík­lega slegið í gegn hjá þessari knatt­spyrnu elskandi þjóð að Heims­meistara­mótið í knatt­spyrnu fer nú fram á ó­venju­legum tíma í nóvember og desember í Katar og því hefur verið nóg að gera á knæpum Kanarí­eyja.

Wa­les og Eng­land eru í sama riðli á HM og mætast í kvöld í loka­um­ferð riðla­keppni mótsins. Eng­lendingar standa betur að vígi á meðan Wa­les­verjar þurfa að treysta á guð og lukku til þess að komast í 16-liða úr­slit eftir afar slæmt tap gegn Íran í síðustu um­ferð.

Það hefur verið í nægu að snúast hjá lög­reglunni á Kanarí­eyjum undan­farna daga í tengslum við æsta stuðnings­menn Wa­les og Eng­lands á HM. Komið hefur til á­taka milli þessara tveggja stuðnings­manna­hópa þar sem kappið hefur borið þá ofur­liði.

Sky News greinir nú frá því að lögreglan á Spáni mun auka við viðbragð sitt á Kanaríeyjum í tengslum við leik Wales og Englands í kvöld til þess að koma í veg fyrir átök milli stuðningsmannahópanna.

Er þetta gert á helstu stöðunum þar sem enskir og velskir ferðamenn halda sig en myndbönd sem hafa farið í dreifingu á samfélagsmiðlum sýna átökin milli hópanna þar sem hnefarnir hafa verið látnir tala.