Haukur Páll Sigurðsson, fyrirliði Vals, mun sjá á eftir Heimi Guðjónssyni sem þjálfara en er á sama tíma spenntur fyrir því að starfa með Ólafi Jóhannessyni. Heimir lét af störfum í gær og Ólafur tók við.

Valur er í fimmta sæti Bestu deildar karla með tuttugu stig, fjórtán stigum á eftir toppliði Breiðabliks. Árangurinn þykir vonbrigði miðað við gæði leikmannahópsins.

„Það er alltaf leiðinlegt að maður missi starfið sitt. Menn voru greinilega ekki sáttir með stöðuna. Það er leiðinlegt að missa Heimi, hann er algjör toppmaður, sigursælasti þjálfari Íslands og frábært að hafa unnið með honum,“ segir Haukur í samtali við Fréttablaðið.

Haukur var spurður út í það hvort honum hafi þótt kominn tími til að fríska upp á hlutina á Hlíðarenda áður en Heimir hvarf á braut.

„Ég styð bara við bakið á þeim þjálfara sem er með mig á hverjum tímapunkti. Ég einbeiti mér bara að fótboltanum og er aldrei að velta fyrir mér hvort það eigi að skipta um þjálfara. Ég mæti bara á æfingar og geri mitt besta. Það eina sem ég get gert er að hugsa um mig og reyna svo að aðstoða aðra leikmenn á vellinum.“

Sem fyrr segir er Ólafur Jóhannesson nú tekinn við. Þetta er ekki í fyrsta sinn sem hann stýrir Val. Hann varð Íslandsmeistari með liðinu 2017 og 2018 og bikarmeistari 2015 og 2016. Haukur kveðst spenntur fyrir því að vinna með honum að nýju.

„Það gekk vel með Óla þegar hann var síðast hjá okkur. Nú þurfum við bara að snúa bökum saman. Óli er, eins og Heimir, algjör toppþjálfari. Þeir hafa unnið þetta allt saman. Við leikmenn þurfum líka að stíga upp. Við erum ekki ánægðir með mótið hingað til, en það er nóg eftir og hellingur að keppa að.“

„Ég held það sé oft gott að hver og einn líti inn á við og sjái hvað hann getur komið með að borðinu áður en maður fer að líta í kringum sig. Get ég æft meira? Hugsað betur um mig? Það eru alls konar litlir hlutir sem hver og einn þarf að pæla í. Svo þarf að standa saman í þessu. Það er hellingur eftir,“ segir Haukur Páll Sigurðsson, fyrirliði Vals.