Hannes Þór Halldórsson fyrrum markvörður íslenska landsliðsins hefur hafnað því að ganga í raðir Leiknis. Frá þessu er greint á vefsíðunni 433.is og hefur miðillinn þetta eftir öruggum heimildum.

Leiknir hafði reynt að sannfæra Hannes um að ganga í raðir uppeldisfélagsins. Hannes og Valur sömdu um starfslok á síðasta ári.

,,Hannes hefur ekki gefið það út hvort hann haldi áfram í fótbolta eða hætti alfarið. Hins vegar er ljóst að hann mun ekki ganga í raðir Leiknis," segir í frétt 433.is um málið.

Leiknir hafði vonast til að fá Hannes heim í Breiðholt þar sem hann hóf feril sinn á sínum tíma en Hannes lét forráðamenn Leiknis vita í vikunni að hann myndi ekki taka tilboði félagsins.

Hannes er 37 ára gamall. Hann á að baki 205 leiki í efstu deild hér á landi, hann hefur orðið Íslandsmeistari í þrígang og bikarmeistari í tvígang. Hann fór á tvö stórmót með íslenska landsliðinu en lagði landsliðshanskana á hilluna í fyrra.