Halldór Jóhann Sigfússon hefur verið ráðinn aðstoðarþjálfari íslenska kvennalandsliðsins í handbolta en hann verður aðstoðarmaður Arnars Péturssonar sem tók við stjórnartaumunum hjá liðinu af Axel Stefánssyni í haust.

Halldór Jóhann hefur mikla reynslu bæði sem þjálfari og leikmaður. Halldór lék hér heima með bæði KA og Fram auk þess að leika nokkur ár í Þýskalandi. Hann tók við þjálfun kvennaliðs Fram haustið 2012 og gerði þær að Íslandsmeisturum vorið 2013.

Síðar tók hann við karlaliði FH og þjálfaði Hafnarfjarðarliðið í fimm ár og varð liðið bikarmeistari undir hands stjórn síðastliðinn vetur. Í sumar þjálfari Halldór U21 og U19 ára landslið Barein þar sem bæði lið náðu sínum besta árangri hingað til á heimsmeistaramóti.

Þá hefur Gísli Guðmundsson hefur verið ráðinn sem markmannsþjálfari íslenska liðsins. Gísli hefur mikla reynslu bæði sem leikmaður og þjálfari. Gísli hefur áður komið að markmannsþjálfun hjá HSÍ en hann hafði yfirumsjón með markmannsþjálfun yngri landsliða HSÍ frá 2012 til 2016. Síðastliðið sumar var Gísli markmannsþjálfari U-21 árs landsliðs karla.

Ísland hefur leik í undankeppni EM 2020 í næstu viku. Liðið leikur fyrst gegn Króatíu ytra miðvikudaginn 25. september en svo koma Frakkar í heimsókn sunnudaginn 29. september og leika gegn stelpunum okkar að Ásvöllum í Hafnarfirði kl. 16.00.

Frítt verður á leikinn gegn Frökkum í boði KFC.

Gísli Guðmundsson verður markmannsþjálfari íslenska liðsins.
Mynd/HSÍ