Gunnar Nelson mætir Bryan Barberena í bardagabúrinu á vegum UFC á laugardaginn næstkomandi og segist hann nú sem áður fyrr fara inn í bardaga með það að markmiði að klára andstæðing sinn.
Íslendingurinn knái er mættur til Lundúna þar sem fram undan er risa bardagakvöld UFC í O2-höllinni í London. Gunnar sat fyrir svörum á blaðamannafundi í dag þar sem hann var spurður út í komandi bardaga sinn gegn Barberena.
„Ég fer alltaf inn í mína bardaga með það að markmiði að klára þá, það sama gerir hann og því tel ég að þessi bardagi muni ekki fara alla leið í dómaraúrskurð. Ég mun reyna að klára hann eins fljótt og auðið er, ef það dregst eitthvað þá í annarri eða þriðju lotu. Sjáum til.“
Telja mætti Gunnar sem bardagamann á heimavelli í Lundúnum en þar hefur hann oft stigið inn í bardagabúrið í O2-höllinni.
„Mér líður eins og ég eigi heima hérna, ég gisti á sama hóteli, sé sama fólkið og áður. Mér líður vel hér.“
Síðasti bardagi Gunnars fór einmitt fram í O2-höllinni fyrir ári síðan og þar bar hann sigur úr býtum gegn Takashi Sato.
„Það var gott að koma aftur og finna sigurtilfinninguna á nýjan leik. Fyrir bardagann gegn Sato hafði ég tapað tveimur bardögum á dómaraákvörðunum, það var ekki gott að koma inn í þann bardaga með tvö töp á bakinu og því er tilfinningin núna mun betri.
Um undirbúning sinn fyrir bardaga sinn gegn Barberena hafði Gunnar þetta að segja:
„Fyrir síðustu bardagana mína hefur undirbúningurinn verið framúrskarandi og gengið mjög vel í samanburði við undirbúninginn fyrir það. Að sama skapi tel ég þá staðreynd að ég hef verið laus við meiðsli núna til lengri tíma hafa hjálpað í þessu.“
UFC 286 bardagakvöld UFC í O2-höllinni í Lundúnum fer fram á laugardaginn næstkomandi. MMA sérfræðingur Íslands, Pétur Marínó Jónsson mun lýsa herlegheitunum í beinni útsendingu á Viaplay.
