UFC bardagakappinn Gunnar Nelson var gestur í nýjasta þætti Blökastsins sem er í umsjón FM95Blö bræðra Audda, Steinda Jr og Egils Einarssonar.
Gunnar berst á bardagakvöldi UFC í Lundúnum í mars og mætir þar Bandaríkjamanninum Daniel Rodriguez.
Í Blökastinu var Gunnar meðal annars spurður út í andstæðing sinn í London og hann var sammála Steinda Jr. sem sagði hann hættulegan.
„Hann er það. Hann er fyrst og fremst striker, svona boxari. Hann er villtur, það er svolítið street í honum.“
Steindi, sem er mikill áhugamaður um UFC benti á að þó Rodriguez væri sterkastur standandi þá væri ekkert auðvelt að ná honum í gólfið, þar sem styrkleikar Gunnars liggja.
„Hann er með nokkuð góða fellivörn. Er það taktíkin hjá ykkur að finna bara nógu margar leiðir til þess að ná honum niður?" spurði Steindi og Gunnar svaraði því játandi.
„Já það er partur af því, að finna glufurnar í glímunni hans sem og þegar að hann er standandi.“
Hluti af undirbúningnum felist í því að horfa á fyrri bardaga Rodriguez.
„Við horfum á bardagana hans og reynum að koma auga á einhverjar venjur hjá honum, eitthvað sem hann hefur gert lengi og gerir enn þá, hluti sem hann hefur verið að vinna með upp á síðkastið.
Í grunninn horfir maður á andstæðinginn, sér hvernig hann berst og hvar menn eiga erfitt með hann og tengir það við sinn eigin styrkleika. Með því getur maður áttað sig á því hvar andstæðingurinn er sterkur.
Hver og einn bardagamaður er með sína eigin orku og stundum kemur það manni á óvart. Margt af þessu kemur bara þegar maður stígur inn í búrið og finnur flæðið.“
