Greint er frá raunum Gunnars í frétt sem birtist á RÚV. Gunnar fór á Old Trafford með þremur sonum sonum sínum en þar átti Manchester United leik gegn Everton í ensku úrvalsdeildinni. Rétt fyrir leik, féll starfsmaður Manchester United á vellinum til jarðar þar sem hann lá síðan meðvitundarlaus.

Gunnar sem hafði reynslu af björgunarstörfum bauð strax fram aðstoð sína. ,,Þeir hleypa mér að manninum þarna og hann er þá í mjög öflugum krampa og er orðinn frekar bláleitur í framan og andaði ekki. Ég fór og velti honum í hliðarlegu og opnaði öndunarveginn hjá honum og bað um að fá súrefni. Sem ég fékk, töskuna af leikvanginum. Maðurinn var í krampa í um það bil sjö mínútur," segir Gunnar í samtali við RÚV.

Gunnar Rúnar og synir hans þrír / Mynd:Gunnar Rúnar

Flutti manninn sjálfur á sjúkrahús

Gunnar gat komið önduninni aftur í gang hjá manninum en í ljós kom þegar að flytja átti manninn á sjúkrahús að um það bil eins og hálfs klukkustundar bið væri eftir sjúkrabíl. ,,Þá stakk ég upp á því við yfirmann vallarmála á Old Trafford að við myndum bara keyra með hann á sjúkrahús. Sem við og gerðum. Fórum í 40 mínútna bílferð í gegnum Manchester til þess að fara með hann á sjúkrahús," sagði Gunnar um raunir sínar á Old Trafford.

Synir Gunnars urðu eftir á vellinum. ,,Þeir voru bara í besta yfirlæti á VIP-klúbbi Old Trafford að borða og drekka allt það sem þá langaði og síðan fengu þeir sögustund þarna um völlinn.

Bjargaði manninum frá varanlegum skaða

Gunnar vill ekki ganga svo langt að segja að hann hafi bjargað lífi mannsins en hann segir líklegt að kunnátta sín hafi hjálpað til þarna. ,,Ég allavegana klárlega hjálpaði til við að hann varð ekki varanlega skertur af þessu," sagði Gunnar Rúnar Ólafsson, varaslökkviliðsstjóri á Akureyri í samtali við RÚV.