Ilkay Gundogan segir ekki endilega víst að hann semji á ný við Manchester City en hann á fimmtán mánuði eftir af samningi sínum á Etihad-vellinum.

Þýski miðjumaðurinn er á þriðja tímabili sínu hjá Manchester City eftir að félagið keypti hann frá Dortmund. Hann skrifaði þá undir fjögurra ára samning sem klárast næsta sumar.

Gundogan sem er 28 ára gamall sat fyrir spurningum blaðamanna í dag og gaf til kynna að hann gæti yfirgefið ensku meistarana á næstunni þótt að honum liði vel í Manchester.

„Ég er orðinn 28 ára gamall og veit að næsti samningurinn verður líklegast hjá því liði sem ég mun spila með út ferilinn. Kannski er kominn tími á að prófa nýja áskorun, ég er með opinn hug fyrir því. Við munum skoða okkar mál í sumar.“