Franski fjölmiðillinn Le Parisen slær því upp í grein sinni að Guðjón Valur Sigurðsson og þýski hornamaðurinn Uwe Gensheimer muni skipta um lið í sumar. 

Þannig myndi Guðjón Valur ganga til liðs við PSG þar sem Gensheimer hefur spilað frá árinu 2016 og Gensheimer leysa íslenska landsliðsmanninn af í vinstra horninu hjá Rhein-Neckar Löwen. 

Þetta yrði þá í annað skipti sem Guðjón Valur myndi leysa Gensheimer af hólmi, en Guðjón gekk í raðir þýsku Ljónanna frá Barcelona þegar þýski landsliðsmaðurinn fór frá Rhein-Neckar Löwen til PSG á sínum tíma. 

Fram kemur i frétt franska fjölmiðilsins að málin í kringum þessi félagaskipti séu komin svo langt á veg að þau verði kláruð í næstu viku. 

Guðjón Valur hefur nú þegar orðið landsmeistari í Danmörku, Þýskalandi og Spáni og gæti nú verið að bæta Frakklandi við.