Guðrún Brá Björgvinsdóttir, atvinnukylfingur úr Keili, og Guðmundur Ágúst Kristjánsson, atvinnukylgingur úr Golfklúbbi Reykjavíkur eru kylfingar ársins hjá golfsambandi Íslands. Þetta er í fyrsta sinn sem Guðrún Brá fær þessa viðurkenningu en Guðmundur Ágúst fékk þessa viðurkenningu í fyrsta sinn í fyrra og er þetta því í annað sinn sem hann er kylfingur ársins.

Birgir Leifur Hafþórsson hefur oftast verið kjörinn kylfingur ársins í karlaflokki eða alls 11 sinnum. Ólafía Þórunn Kristinsdóttir er sú sem oftast hefur fengið þessa viðurkenningu hjá konunum eða alls sex sinnum.

Guðrún Brá er fædd árið 1994 og hefur alla tíð leikið fyrir Golfklúbbinn Keili í Hafnarfirði. Hún gerðist atvinnukylfingur árið 2018 er með keppnisrétt á LET Evrópumótaröðinni – sem er sterkasta atvinnumótaröð í kvennaflokki í Evrópu. Guðrún Brá er fjórða konan frá Íslandi sem tryggir sér keppnisrétt á LET Evrópumótaröðinni. Ólöf María Jónsdóttir, Ólafía Þórunn Kristinsdóttir og Valdís Þóra Jónsdóttir hafa einnig verið með keppnisétt á LET.

Á árinu 2020 lék Guðrún Brá á alls 11 atvinnumótum. Hún keppti á þremur mótum á LET Access mótaröðinni sem er næst sterkasta atvinnumótaröðin í Evrópu í kvennaflokki. Besti árangur hennar á LET Access var 14. sæti. Á sjálfri LET Evrópumótaröðinni lék hún á alls 8 mótum og besti árangur hennar var 39. sæti.

Guðrún Brá verður með keppnisrétt á LET Evrópumótaröðinni á næsta ári. Hún sigraði á Íslandsmótinu í golfi 2020 í þriðja sinn í röð og alls hefur hún landað þremur Íslandsmeistaratitlum. Aðeins fimm konur hafa sigrað á Íslandsmótinu í golfi þrjú ár í röð og er Guðrún Brá ein þeirra.Á heimslistanum hefur Guðrún Brá farið upp um tæplega 200 sæti á þessu ári en hún er í sæti nr. 861 á heimslistanum.

Náði aðalmarkmiði sínu á árinu

„Það er ánægjulegt og mikill heiður að fá þessa útnefningu í fyrsta sinn á ferlinum. Árið 2020 var undarlegt ár – þar sem að nánast allar áætlanir fóru út um þúfur vegna Covid-19 faraldursins. Ég byrjaði árið á því að ná aðalmarkmiðinu, að fara á lokaúrtökumótið og komast inn á LET Evrópumótaröðina. Það tókst og er í raun hápunktur ársins 2020," segir Guðrún Brá í samtali við GSÍ um árið hjá henni.

„Það var mikil spenna og eftirvænting hjá mér að leika heilt tímabil á LET og keppnisdagskráin var þétt og áhugverð. Það var svekkjandi fyrir alla að Covid ástandið setti allt keppnishaldið á hliðina og úr skorðum. Óvissan hefur því verið mikil frá því í vor og tekið á andlegu hliðina. Ég hef reynt að vera eins tilbúin og hægt er, vera klár þegar mót hafa verið sett á með stuttum fyrirvara. Ég hef líka reynt að horfa á þetta ástand með jákvæðu hugarfari," segir hún um þetta ár sem einkenndist af kórónaveirunni.

„Ég fékk tækifæri til að spila á nokkrum LET mótum, og ég veit því hvað ég þarf að gera til að ná enn lengra. Covid-19 ástandið hefur gert það að verkum að ég hef fengið tækifæri til að vinna í hlutum sem ég hef aldrei haft tíma til að vinna í á venjulegu keppnistímabili. Ég er bjartsýn fyrir næsta ár og ég ætla mér að koma sterkari til leiks. Íslandsmótið 2020 var einnig einn af hápunktum ársins 2020. Það var mikil spenna á lokaholunum og ég var ánægð með sjálfa mig að hafa klárað það mót við þær aðstæður,“ segir Guðrún.

Hápunkturinn var fimmta sætið í Norður-Írlandi

Guðmundur Ágúst er fæddur árið 1991 og er í Golfklúbbi Reykjavíkur. Frá árinu 2017 hefur hann verið atvinnukylfingur. Á árinu 2020 var Guðmundur Ágúst með keppnisrétt á næst sterkustu atvinnumótaröð Evrópu, Áskorendamótaröðinni en aðeins fimm íslenskir kylfingar hafa öðlast keppnisrétt á þeirri mótaröð. Birgir Leifur Hafþórsson, Axel Bóasson, Guðmundur Ágúst Kristjánsson, Haraldur Franklín Magnús og Andri Þór Björnsson.

Guðmundur Ágúst endaði í 46. sæti á stigalistanum sem er næst besti árangur hjá íslensku atvinnukylfingi á Áskorendamótaröðinni.

Besti árangur hans var á móti sem fram fór á Norður-Írlandi þar sem að Guðmundur Ágúst endaði í 5. sæti. Guðmundur Ágúst hefur farið hratt upp heimslistann á undanförnum misserum. Frá árinu 2017 hefur hann farið upp um 1500 sæti en hann var í sæti númar 510 á síðasta heimslista.

„Það er mikill heiður að fá þessa viðurkenningu annað árið í röð. Tímabilið var ágætt að mörgu leyti og frábært að vera í hópi þeirra 45 sem fengu tækifæri að leika á lokamótinu á Mallorca. Helstu vonbrigðin var að enda ekki hærra á peningalistanum eftir að hafa komið mér í góða stöðu á mótinu sem fram fór í Portúgal.

Það sem stendur upp úr á árinu er árangurinn á mótinu á Norður-Írlandi þar sem ég var ekki langt frá verðlaunasæti og einnig að komast inn á lokamótið. Ég ætla að mæta tvíefldur á næsta ári eftir þetta undarlega ár og gera enn betur,“ segir Guðmundur Ágúst Kristjánsson í samtali við GSÍ.

Guðmundur Ágúst Kristjánsson náði best fimmta sæti Áskorendamótaröðinni á árinu sem er að líða.
Mynd/GSÍ