Þetta er í 24. skipti sem valið á kylfingi ársins fer fram bæði hjá konum og körlum. Þetta er í annað skipti sem Guðrún Brá hlýtur titilinn og í þriðja skipti sem Haraldur Franklín er valinn kylfingur ársins.

Alls lék Guðrún Brá á 16 mótum á LET Evrópumótaröðinni á þessu tímabili. Besti árangur hennar á tímabilinu er 12. sæti. Hún varð Íslandsmeistari í holukeppni 2020 á Þorláksvelli. Á LET Evrópumótaröðinni lék hún á alls 16 mótum og besti árangur hennar var 12. sæti. Guðrún Brá verður með keppnisrétt á LET Evrópumótaröðinni á næsta ári. Á heimslistanum hefur Guðrún Brá farið upp um tæplega 255 sæti á þessu ári en hún er í sæti nr. 620 á heimslistanum," segir í tilkynningu Golfsambands Íslands.

,,Það er mikill heiður og hvatning að fá þessa viðurkenningu annað árið í röð. Tímabilið var að mínu mati gott hjá mér þrátt fyrir að heimsfaraldur hafi haft mikil áhrif á mótahaldið. Ég keppti alls á 14 mótum á sterkustu atvinnumótaröð Evrópu og komst í gegnum niðurskurðinn á 9 þeirra. Það sem stendur hæst upp úr er 12. sætið á móti sem fram fór í London í maí og einnig árangurinn í liðakeppninni á Aramco Team Series sem fram fór í Sádí Arabíu í nóvember. Þar enduðum við í 8. sæti sem að mínu mati er frábær árangur. Ég náði einnig að komast inn á lokamót LET annað árið í röð og lokakaflinn á tímabilinu var sterkur hjá mér – sem ég er ánægð með. Ég náði að leika mjög vel á þremur af alls fjórum hringjum á lokamótinu – og komst upp í 75. sæti á stigalista mótaraðarinnar. Sá árangur gefur mér fullan keppnisrétt á LET á næsta tímabili. Ég trúi því að mótahaldið á næsta ári verði nálægt því að vera eðlilegt. Það ríkir tilhlökkun hjá mér fyrir næsta tímabil sem hefst í febrúar á næsta ári. Það verður hinsvegar gott og nauðsynlegt að taka frí um jólahátíðina og njóta þess að vera með fjölskyldu og vinum hér á Íslandi," segir Guðrún Brá, kylfingur ársins hjá Golfsambandi Íslands.

Haraldur Franklín hefur á undanförnum tveimur tímabilum verið með keppnisrétt á áskorendamótaröðinni Challenge Tour, sem er næst sterkasta atvinnumótaröð í Evrópu. ,, Haraldur Franklín endaði í 48. sæti á stigalistanum sem er besti árangur hans á Áskorendamótaröðinni (Challenge Tour). Til samanburðar endaði hann í 85. sæti á þessum stigalista í fyrra. Hann hóf tímabilið í sæti nr. 102 á stigalistanum og á tímabilinu fór hann hæst í sæti nr. 38. Haraldur Franklín var aðeins þremur sætum frá því að komast inn á lokamót Áskorendamótaraðarinnar. Besti árangur hans á tímabilinu var 2. sætið á B-NL mótinu sem fram fór Hollandi í lok ágúst en besti árangur hans á árinu 2019 var 14. sæti," segir í tilkynningu frá Golfsambandi Íslands.

,,Ég er þakklátur og það er mikill heiður að fá þessa viðurkenningu í þriðja sinn á ferlinum. Þegar ég lít til baka á atvinnumannaferilinn þá hefur verið stígandi í þessu hjá mér á hverju ári. Ég byrjaði með ekkert, komst inn á Nordic- Tour – var valinn nýliði ársins þar. Komst inn á Opna breska meistaramótið, vann mig inn á Áskorendamótaröðina. Var í baráttunni í ár að komast inn á stærsta sviðið, Evrópumótaröðina, og í mun betri stöðu núna en í byrjun ársins. Tímabilið í ár var í raun fyrsta alvöru tímabilið á Áskorendamótaröðinni þar sem að tímabilið í fyrra var mjög laskað vegna heimsfaraldurs – aðeins örfá mót voru á dagskrá. Ég náði fyrsta markmiðinu mínu sem var að komast í keppni um sigur á nokkrum mótum og vera á meðal 7 0efstu á stigalista mótaraðarinnar. Markmið númer 2 var að vera meðal 45 efstu. Ég var grátlega nálægt því. En ég er á mun betri stað á mótaröðinni núna en ég var í fyrra. Það gætu opnast gluggar inn á einhver mót á Evrópumótaröðinni en ég á ekki von á því þar sem að enginn missti keppnisrétttinn á Evrópumótaröðinni á þessu tímabili.
Besta mótið hjá mér í ár var í Hollandi þar sem ég komst í bráðabana um sigurinn. Það voru fjórir kylfingar í bráðabananum og það var rosalega gaman að upplifa slíkt en svekkjandi að ná ekki að vinna. Ég get ekki beðið eftir því að upplifa „eðlilegt tímabil“. Það var fullt starf að púsla þessu öllu saman á þessu ári. Ég hef hef misst tölu á hvað þetta vöru: mörg flug, mörg lönd, mörg covid próf, mörg undanþágubréf til að komast inní mismunandi lönd, Og svo framvegis. Keppnistímabilið á að byrja í Suður-Afríku í febrúar á næsta ári en það er óvíst hvernig þetta fer miðað við stöðuna á faraldrinum núna. Það eina sem ég ætla að gera er að æfa eins mikið og ég get fram að fyrsta móti á nýju ári," segir Haraldur Franklín, kylfingur ársins hjá Golfsambandi Íslands.