Kylfingurinn Guðrún Brá Björgvinsdóttir lék í dag fimmta og síðasta hringinn á lokastigi úrtökumóts fyrir Evrópumótaröðina í golfi kvenna á La Manga á Spáni. Guðrún Brá spilaði lokahringinn á tveimur höggi yfir pari vallarins og hringina fimm þar með á þremur höggum yfir pari.

Það skor skilar henni í 10. - 19. sæti á mótinu en 20 efstu kylfingarnir fá þátttökurétt í Evrópumótaröðinni þetta keppnistímabilið. Guðrún Brá hefur þar af leiðandi öðlast þátttökurétt á mótaröðinni í fyrsta skipti á ferli sínum en þetta er í þriðja skipti sem hún reynir við þann áfanga.

Efstu fimm kylf­ing­arn­ir fá þátt­töku­rétt á Evr­ópu­mótaröð kvenna sem kall­ast 5c. Kylf­ing­ar í 6.-20. sæti fá þátt­töku­rétt 8a og þeir sem enda í sæt­um 21-60 fá þátt­töku­rétt 9b. Sá þátttökuréttur sem Guðrún Brá fær skilar henni inngöngu í flest mót á árinu.

Guðrún Brá lék stöðugt golf á þessum fimm hringjum en hún var allan tímann á meðal efstu kylfinga á mótinu. Fyrst hringinn lék hún á tveimur yfir pari vallarins, annar hringurinn var sá besti en þá lék hún á fjórum undir pari, þriðja hringinn spilaði hún svo á þremur yfir pari og þann fjórða á pari.

Hún fékk svo tvo skolla á fyrstu og síðustu holu á lokahringnum en lék hinar 16 holurnar á pari vallarins.