Kylfingarnir Guðmundur Ágúst Kristjánsson úr GR og Birgir Leifur Hafþórsson úr GKG eru báðir á meðal keppenda á Áskorendamótaröðinni í golfi þessari viku. Mótaröðin er sú næst sterkasta hjá atvinnukylfingum í Evrópu.

Keppt er í Frakklandi á móti sem heitir Open de Bretagne og fer fram á Golf Bluegreen de Pléneuf Val André.

Eftir fyrsta hring sem Guðmundur Ágúst spilaði á þremur höggum undir pari vallarins og er í öðru sæti tveimur höggum á eftir Frakkanum Victor Joffray sem er í forystu.

Birgir Leifur er hins vegar í 7. - 19. sæti á mótinu eins og sakir standa en hann hefur leikið fyrstu átta holurna á fyrsta hringnum á einu höggi undir pari vallarins.

Guðmundur Ágúst öðlaðist keppnisrétt á Áskorendamótaröðinni með því að sigra á þremur mótum á Nordic Tour atvinnumótaröðinni á þessu tímabili.

Mótið í Frakklandi er það fjórða á tímabilinu sem tekur Guðmundur Ágúst tekur þátt í á Áskorendamótaröðinni. Hann hefur komist í gegnum niðurskurðinn á tveimur þeirra og besti árangur hans er 51. sæti.

Þetta er aftur á móti þriðja mótið á tímabilinu hjá Birgi Leifi á Áskorendamótaröðinni. Birgir Leifur hefur ekki komist í gegnum niðurskurðinn á fyrstu tveimur mótunum.

Birgir Leifur hefur frá árinu 1999 leikið á þessari mótaröð. Hann sigraði á einu móti árið 2017 og er hann eini íslenski kylfingurinn sem hefur sigrað á atvinnumótaröð í næstefsta styrkleikaflokki.