Guðmundur Þórður Guðmundsson, þjálfari íslenska karlalandsliðsins í handbolta, hefur valið 17 leikmenn fyrir leiki liðsins gegn Litáen og Ísrael í undankeppni EM 2022. Leikirnir sem eru fyrstu leikir undankeppninnar fara báðir fram í Laugardalshöll.

Athygli vekur að Óskar Ólafsson, leikmaður norska liðsins Drammen, er í hópnum en hann er eini nýliðinn í hópnum. Þá koma Gísli Þorgeir Kristjánsson og Ómar Ingi Magnússon sem spila báðir hjá Magdeburg aftur inn í leikmannahóp íslenska liðsins.

Gísli Þorgeir er að snúa til baka eftir langvinn meiðsli og Ómar Ingi hefur jafnað sig á höfuðhöggi sem hélt honum utan vallar í þó nokkurn tíma.

Oddur Grétarsson sem leikur fyrir þýska liðið Balingen er síðan annar vinstri hornamannanna. Oddur spilaði síðast með landsliðinu árið 2012.

Til stendur að leika tvo leiki hér heima í þessari landsliðsviku þar sem Ísrael óskaði eftir að víxla heimaleikjum vegna ástandsins þar og varð HSÍ við þeirri ósk.

Ísland tekur á móti Litháen miðvikudaginnn 4. nóvember og svo Ísrael sunnudaginn 7. nóvember.

Leikmannahóp íslenska liðsins má sjá hér að neðan:

Markverðir:
Björgvin Páll Gústavsson, Haukar, 229/13
Viktor Gísli Hallgrímsson, GOG Håndbold, 17/0

Vinstra horn:
Bjarki Már Elísson TBV Lemgo Lippe, 71/165
Oddur Grétarsson, HBW Balingen-Weilstetten, 18/31

Vinstri skytta:
Ólafur Andrés Guðmundsson, IFK Kristianstad, 123/230
Aron Pálmarsson, FC Barça, 148/576
Daníel Þór Ingason, Ribe Esbjerg HH, 30/9
Óskar Ólafsson, Drammen, 0/0

Miðjumenn:
Elvar Örn Jónsson, Skjern Håndbold, 34/87
Gísli Þorgeir Kristjánsson, SC Magdeburg, 23/31
Janus Daði Smárason, Göppingen, 45/64

Hægri skytta:
Ómar Ingi Magnússon, SC Magdeburg, 46/129
Viggó Kristjánsson, TVB 1898 Stuttgart, 10/17

Hægra horn:
Arnór Þór Gunnarsson, Die Bergische Handball Club, 113/327
Sigvaldi Björn Guðjónsson, Vive Tauron Kielce, 28/54

Línumenn:
Arnar Freyr Arnarsson, MT-Melsungen, 51/67
Ýmir Örn Gíslason, Die Rhein-Necker Löwen, 41/18