Pep Guardiola, knattspyrnustjóri Manchester City, segist stefna að því að enda þjálfaraferilinn á sama máta og hann hóf hann, með því að þjálfa unglingalið og þá helst lið Barcelona.

Guardiola sem er 47 ára gamall er á þriðja tímabili sínu á Englandi eftir að hafa áður stýrt liðum Bayern Munchen og Barcelona. Hóf hann ferilinn sem þjálfari varaliðs Barcelona árið 2007 og tók við aðalliðinu ári síðar.

Hefur hann náð ótrúlegum árangri hvar sem hann hefur þjálfað og er með samning á Englandi út næstu þrjú ár. Hefur hann þegar gefið út að hann ætli sér ekki aftur að þjálfa aðallið Barcelona þar sem hann fann fyrir ótrúlegri pressu.

Staðfesti hann í samtali við fjölmiðla í heimalandinu í viðtali sem birtist í dag að hann ætlaði sér aftur til Spánar þar sem hann ætlaði aftur út í þjálfun ungmenna. Kvaðst hann vongóður um að fá starf hjá fyrrum félagi sínu.