Búist er við því að Brittney Griner muni bera vitni í rússneskum réttarsal í dag. Griner hefur verið í haldi í Rússlandi síðan í febrúar eftir að kannabisvökvi fyrir rafsígarettur fannst í farangri hennar við komuna til landsins.

Griner játaði sök í málinu fyrr í mánuðinum. Vonast er til að það muni hjálpa henni nú. Talið hefur verið að Griner geti fengið allt að tíu ára fangelsi fyrir að koma með kannabisvökvann til landsins.

Rússar hafa boðið bandarískum stjórnvöldum að skiptast á föngum ef Bandaríkin eru tilbúin að sleppa vopnasalanum Viktor Bout úr haldi sem var á sínum tíma dæmdur í 25 ára fangelsi.

Fyrr í þessum mánuði sendi Griner bréf á Joe Biden, Bandaríkjaforseta, þar sem hún bað um aðstoð.

„Er ég sit hér í rússnesku fangelsi, ein með hugsunum mínum og án verndar frá konu minni, fjölskyldu og vinum, án ólympíutreyjunnar minnar eða neins af því sem ég hef afrekað, er ég hrædd um að vera hér að eilífu,“ var á meðal þess sem stóð í bréfinu.

„Þann 4. júlí (þjóðhátíðardagur Bandaríkjanna) heiðrar fjölskylda okkar yfirleitt þá sem börðust fyrir frelsi okkar, eins og pabba mínum í Víetnam. Það er sárt að þessi dagur þýðir eitthvað allt annað fyrir mig í þetta skiptið.“

„Ég bið þig um að gera allt sem þú getur til að koma mér heim. Ég kaus í fyrsta sinn árið 2020 og ég kaus þig. Ég trúi á þig. Ég hef enn svo margt við frelsið mitt að gera og þú getur aðstoðað mig við að endurheimta það. Ég sakna fjölskyldunnar minnar, ég sakna konunnar minnar, ég sakna liðsfélaga minna. Það lætur mér líða svo illa að þau þjáist svo mikið núna. Ég er þakklát fyrir hvað sem þú getur gert til að koma mér heim.“