Sjáðu myndbandið: Grét er hann fékk stóru tíðindin í beinni útsendingu

Jens Pulver, fyrrum bardagakappi á vegum UFC samtakanna hefur verið tekinn inn í frægðarhöll UFC. Frá þessu var greint á bardagakvöldi UFC, UFC 284 í Ástralíu um nýliðna helgi. Tíðindin komu Pulver, sem var að streyma viðbrögðum sínum við kvöldinu á Twitch, alveg að óvörum.

Pulver hóf að keppa á vegum UFC árið 1999 og eftir fjóra bardaga fékk hann sinn fyrsta titilbardaga er hann mætti Caol Uno í búrinu. Þar bar Pulver sigur úr býtum og varð um leið fyrsti meistari nýstofnaðrar léttivigtardeildar UFC. Pulver á því sérstakan sess í sögu UFC.

Alls varði hann titilinn tvisvar og átti seinna á sínum ferli eftir að fá annan titilbardaga en hann tapaðist gegn Urijah Faber.

Yfir nýafstöðnu bardagakvöldi UFC í Ástralíu um helgina var Pulver að streyma frá heimili sínu á Twitch þar sem áhorfendur gátu fengið aðgang að hans viðbrögðum og sérfræðiþekkingu er kemur að blönduðum bardagalistum.

Pulver hafði hins vegar ekki hugmynd um að á þessu bardagakvöldi yrði tilkynnt að hann yrði tekinn inn í frægðarhöll samtakanna.

Viðbrögð Pulver létu ekki á sér standa og auðsjáanlegt að um stóra og mikilvæga stund var að ræða fyrir hann. Tárin byrjuðu að streyma niður kinnar hans og nærstaddir vinir tóku utan um hann.

„Er ykkur alvara? Þetta er ekki að gerast,“ var eitt af því fáu sem Pulver kom frá sér eftir að tíðindin bárust.

Sjá má myndband af viðbrögðum Pulver hér fyrir neðan: