Gregg Ryder þjálfari karlarliðs Þórs í knattspyrnu og knattspyrnudeild félagsins hafa komist að samkomulagi þess efnis að hann láti af störfum sem þjálfari liðsins eftir tímabilið.

Þetta kemur fram í frétt á heimasíðu Þórs en Gregg mun hætta störfum eftir leik liðsins gegn Magna Grenivík í lokaumferð Inkasso-deildarinnar sem fram fer á Þórsvellinum á morgun.

Þór sem var í harðri baráttu um að komast upp um deild framan af sumri hefur fatast flugið í síðustu leikjum og situr í fimmta sæti deildarinnar með 33 stig og á ekki möguleika á að tryggja sér sæti í efstu deild að ári.

„Liðinu gekk mjög vel stærstan hluta sumarsins en nokkrir samverkandi þættir urðu þess valdandi að okkur tókst ekki að gera atlögu að sæti í efstu deild á lokakaflanum," segir Gregg á heimasíðu Þórs.

„Þrátt fyrir að hafa ekki náð markmiðum okkar um úrvalsdeildarsæti hefur okkur tekist að byggja til framtíðar. Margir ungir leikmenn félagsins hafa öðlast dýrmæta reynslu á vellinum og hafa samhliða tekið miklum framförum. Framtíðin er björt fyrir Þór og ég óska félaginu alls hins besta á komandi árum," segir Gregg enn fremur.

„Ég hef notið hverrar stundar á Akureyri og vil nota tækifærið og þakka öllum sem ég hef kynnst hér fyrir skemmtilegt og gefandi samstarf. Ég vona að ég fái tækifæri til að starfa áfram við íslenska knattspyrnu. DFK,“ segir fráfarandi þjálfari Þórs að endingu.