Landsliðskonan Glódís Perla Viggósdóttir hefur skrifað undir nýjan tveggja ára samning við Rosengård.

Glódís, sem er 23 ára, gekk í raðir Rosengård frá Eskilstuna United eftir Evrópumótið 2017.

„Ég er ánægð með að hafa framlengt samninginn við Rosengård. Ég hlakka til næstu tveggja ára og að halda áfram að þróast sem leikmaður í góðu og metnaðarfullu umhverfi,“ segir Glódís á heimasíðu Rosengård.

Þegar þrjár umferðir eru eftir af sænsku úrvalsdeildinni er Rosengård í 2. sæti, þremur stigum á eftir toppliði Piteå.

Glódís hefur leikið alla 19 deildarleiki Rosengård á tímabilinu og skorað fjögur mörk.