Íslenska landsliðið í handbolta vann í gærkvöld þægilegan tíu marka sigur á Grænhöfðaeyjum þegar liðin mættust í fyrstu umferð milliriðla HM. Lokatölur í Gautaborg urðu 40–30, Íslendingum í vil.
Fyrir leik var ljóst að strákarnir okkar kæmu inn sem mun líklegri aðilinn, að sama skapi vita leikmenn liðsins að ekkert rými er fyrir frekari misstig, líkt og það sem átti sér stað í tapinu gegn Ungverjalandi í riðlakeppninni, ætli liðið sér upp úr milliriðlinum.
Guðjón Guðmundsson, betur þekktur sem Gaupi, leggur mat sitt á frammistöðu íslenska landsliðsins í leiknum gegn Grænhöfðaeyjum sem og framhaldið á HM í samtali við Fréttablaðið.
„Frammistaðan gegn Grænhöfðaeyjum var í sjálfu sér viðunandi. Mér fannst varnarleikurinn hins vegar ekki sannfærandi og þar vantar talsvert mikið upp á hjá okkur. Við höfum ákveðin einstaklingsgæði í okkar liði, gæði sem hafa ekki náð að skína í gegn á þessu heimsmeistaramóti.“
Lykilmenn ekki heilir heilsu
Hann hefur áhyggjur af lykilmönnum íslenska landsliðsins.
„Það er ljóst að margir af okkar lykilmönnum eru ekki alveg heilir heilsu. Aron Pálmarsson hefur engan veginn náð þeim takti sem ég var að vonast eftir, hann á mikið inni. Gísli Þorgeir sömuleiðis, hann er ekki á sama stað og hann var á síðasta Evrópumóti og hefur verið með Magdeburg í vetur.
Að því sögðu er ljóst að fram undan er gríðarlega erfiður leikur gegn Svíum, sem ég spáði heimsmeistaratitlinum fyrir mót. Ég held að íslenska liðið þurfi að eiga algjöran toppleik ætli liðið sér að leggja heimamenn að velli í Gautaborg fyrir framan þrettán þúsund áhorfendur.
Þar þarf fyrst og síðast vörn og markvarsla að vera í algjörum toppi. Þú þarft í það minnsta fjörutíu prósent markvörslu til þess að eiga möguleika gegn Svíum, þá þarftu líka að geta spilað alvöru vörn. Það finnst mér við ekki hafa gert á þessu móti. Það örlaði svolítið á varnarleiknum í fyrsta leik gegn Portúgal en í öðrum leikjum hefur varnarleiknum verið ábótavant.“
Eitthvað sem vantar
Guðmundur Guðmundsson, landsliðsþjálfari Íslands, var duglegur að nefna það fyrir mót að aðaláskorun liðsins væri að ná saman varnarleik sínum. Kemur það þér á óvart hversu erfiðlega hefur gengið að ná varnarleiknum upp?
„Já, það kemur mér á óvart, einfaldlega vegna þess að á síðasta stórmóti var varnarleikurinn í mjög góðu standi. Varnarlína okkar þá var að spila frábærlega, leikmenn eins og Ýmir Örn Gíslason sem hefur ekki geislað eins mikið af á þessu móti.
Mér finnst útgeislunin í liðinu ekki nægilega góð, það er eitthvað sem vantar. Kann að vera að menn eigi eftir að galdra það fram en fyrir mót fannst mér fullmikið í það lagt að segja að við værum með lið sem ætti að vinna til verðlauna á HM.
Ég held að það sé langur vegur frá. Eins og staðan er í dag þá erum við með lið sem er á bilinu sjötta til tíunda sæti í heiminum, sem er býsna gott. Þetta er lið sem getur náð mjög langt, lið sem getur náð í verðlaun en enn sem komið er í mótinu hefur liðið ekki sýnt okkur það.“
Fyrirsjáanlegt upplegg
Þá finnst Gaupa það stinga í augu að skortur sé á fjölbreytni í uppleggi íslenska liðsins í leikjum sínum. Plan A sé til staðar en ekkert bóli á plani B og C.
„Þetta segi ég sérstaklega hvað varðar varnarleikinn, við eigum erfitt með að bregðast við þar. Eins og leikurinn spilaðist á móti Ungverjum þá vorum við með gjörunninn leik í höndunum en köstuðum því frá okkur, auðvitað hljóta að vera einhverjar ástæður fyrir því.
Við vorum bara ekki með, í þeim leik, plan B. Við vorum með plan A sem var næstum því búið að ganga upp en það gekk ekki upp. Það þýðir ekkert að segja ef og hefði, þetta liggur algjörlega fyrir og í augum uppi.“
Það er skammt stórra högga á milli. Á morgun tekur við stærsta áskorun Íslands, til þessa, á heimsmeistaramótinu. Leikur gegn heimamönnum í sænska landsliðinu.
Hefur þú trú á íslenskum sigri gegn Svíþjóð?
„Ég hef alltaf trú á íslenskum sigri, alveg sama hvað gengur á. Ef íslenska liðið nær að galdra fram svipaðan og sama leik og liðið sýndi á Evrópumeistaramótinu á síðasta ári, þá er möguleiki á að vinna Svía.
En Svíar eru hins vegar með frábært lið, frábæra markmenn, spila frábæra vörn og eru í dag með eina bestu útilínu heims og hornamenn á heimsmælikvarða.“
