Það eru liðin sex ár frá því að íslenska karlalandsliðið sló út það enska í 16-liða úrslitum Evrópumótsins í Frakklandi. Um sögulegan atburð var að ræða af mörgum ástæðum.

Leiknum lauk með 2-1 sigri Íslands þar sem Ragnar Sigurðsson og Kolbeinn Sigþórsson skoruðu mörk liðsins eftir að Wayne Rooney hafði komið Englendingum yfir með marki úr vítaspyrnu snemma leiks.

Myndband Steve McClaren þar sem hann vann í setti Sky Sports yfir leiknum vakti heimsathygli en þá brást hann við marki Kolbeins. Óhætt er að segja að þessi fyrrum landsliðsþjálfari Englands hafi verið brúnaþungur.

Enskir fjölmiðlar hökkuðu ensku leikmennina í sig eftir tapið. Í fyrirsögn Guardian um leikinn sagði „England niðurlægt er Ísland slær þá úr leik á Evrópumótinu.“ Voru flestar fyrirsagnir enskra blaða í svipuðum dúr, eða þaðan af verri.

Þá gengu sérfræðingar langt í að gagnrýna enska liðið. Goðsögnin Alan Shearer sagði frammistöðuna þá verstu í sögu enska landsliðsins.

Eftir leik tóku leikmenn Íslands svo hið heimsfræga Víkingaklapp með stuðningsmönnum Íslands, sannkölluð gæsahúðarstund.

Guðmundur Benediktsson, knattspyrnulýsandi með meiru, vakti ekki síður athygli en íslenska liðið. Hann varð heimsfrægur fyrir lýsingar sínar frá mótinu og lét hann sitt ekki eftir liggja er Ísland lagði England, líkt og sjá má hér að neðan.

„Okkur hafði alltaf dreymt um að spila við England, hetjurnar okkar,“ sagði Heimir Hallgrímsson, sem stýrði Íslandi á EM 2016 ásamt Lars Lagerback, um leikinn við England er hann ræddi hann í vitðali árið 2020. „Skrattinn á öxlinni okkar sagði við okkur að kannski værum við of litlir til að spila við England, en leikmennirnir voru frábærir. Að jafna um leið og þeir höfðu komist yfir var sjokk fyrir þá, og líka þegar við komumst 2-1 yfir í fyrri hálfleik.“