Fjöl­miðlar í Argentínu greina frá því að Diego Armando Mara­dona, einn besti knatt­spyrnu­maður sögunnar, sé látinn, sex­tugur að aldri.

Mara­dona gekkst ný­lega undir bráða­að­gerð vegna blóð­tappa í heila. Læknir hans, Leopoldo Luqu­e, sagði í yfir­lýsingu í gær að að­gerðin hefði gengið vel og Mara­dona væri vakandi.

Að því er fram kemur í fréttum argentínsku miðlanna Clarin og Ole fékk Mara­dona hjarta­á­fall í morgun í borginni Tigre í Argentínu. Hann var úrskurðaður látinn skömmu síðar, að því er segir í fréttum argentínsku pressunnar.

Maradona átti ótrúlegan feril sem knattspyrnumaður og varð hann heimsmeistari með Argentínumönnum árið 1986. Það kom fáum á óvart að Maradona var valinn besti leikmaður mótsins. Á þeim tíma var hann leikmaður Napoli en áður hafði hann slegið í gegn með Argentinos Juniors og Boca Juniors í heimalandinu áður en hann samdi við Barcelona árið 1982. Maradona lék 91 landsleik fyrir Argentínu og skoraði í þeim 34 mörk.

Maradona var kosinn besti leikmaður 20. aldarinnar af FIFA. Hann er í guðatölu hjá stuðningsmönnum Napoli eftir að hafa leitt liðið til sigurs í ítölsku deildinni tvisvar, 1987 og 1990. Árið 2000 ákvað félagið að leggja treyju númer 10 til að heiðra argentínska snillinginn. Í Evrópu lék hann með Napoli, Barcelona og Sevilla. Þá er hann í guðatölu í heimalandinu eftir að hafa farið fyrir Argentínumönnum í þeirra fyrsta og eina sigri á HM sem fyrr segir.

Argentínumaðurinn var umdeildur enda glímdi hann við fíkniefnavanda á meðan ferlinum stóð. Eitt frægasta atvik knattspyrnusögunnar þegar hann skoraði með hendinni gegn Englandi í undanúrslitum HM.

Maradona þjálfaði tímabundið eftir að ferlinum lauk og stýrði hann til að mynda argentínska landsliðinu á HM 2010.

Fréttin hefur verið uppfærð.