Sturla Snær Snorrason, A-landsliðsmaður í alpagreinum, byrjar árið heldur betur af krafti en í dag endaði hann í öðru sæti á alþjóðlegu FIS móti á Ítalíu.

Mótið fór fram í Pfelders á Ítalíu en keppt var á tveimur svigmótum. Í gær náði Sturla Snær ekki að ljúka fyrri ferð en í dag gekk honum virkilega vel.

Sturla Snær endaði í öðri sæti, var með besta tímann af öllum í seinni ferðinni og endaði einungis 14/100 úr sekúndum á eftir sigurvegaranum Richard Leitgeb frá Austurríki.

Fyrir mótið fékk hann 37.84 FIS stig sem er hans besta á tímabilinu og alveg við hans heimslistastöðu en þar er Sturla Snær með 36.34 FIS stig.