Vanda Sigurgeirsdóttir, formaður KSÍ, skrifaði í dag stuttan pistil þar sem hún hvetur fólk til að mæta á Laugardalsvöll í kvöld að styðja við ungt landslið karla í leik gegn Liechtenstein í undankeppni HM 2022.

Um er að ræða síðasta heimaleik liðsins í þessari undankeppni og síðasta heimaleikinn þetta árið.

Í yfirlýsingunni sem sjá má hér fyrir neðan talar Vanda um mikilvægi þess að styðja við bakið á landsliðið á þessum miklu breytingartímum.

Styðjum ungt landslið karla í knattspyrnu til dáða í leik á móti Liechtenstein í undankeppni HM á Laugardalsvelli í kvöld kl. 18.45. 

A-landslið karla í knattspyrnu stendur frammi fyrir krefjandi verkefnum á miklum breytingatímum.  Ég vonast til þess að sem flestir sjái sér fært að mæta á völlinn til að hvetja til dáða leikmenn Íslands, sem margir hverjir eru að stíga sín fyrstu skref með landsliðinu, og efla knattspyrnufólk sem keppir fyrir hönd þjóðarinnar.

Áfram Ísland!

Vanda Sigurgeirsdóttir

Formaður KSÍ