Stjórn KSÍ ræddi á síðasta stjórnarfundi sambandsins um flugáætlun Flugfélags Íslands í sumar en samkvæmt þeim upplýsingum sem sambandið hefur frá flugfélaginu mun ferðum fækka og tímasetningar breytast. „Ef af verður hafa þessar breytingar neikvæð áhrif á ferðatilhögun liða og auka kostnað þeirra. KSÍ hefur nálgast ÍSÍ með þetta mál og mun ÍSÍ ræða það við flugfélagið á fundi nú í maí,“ segir í fundargerð KSÍ.

Eitt af landsbyggðarliðunum sem þarf oft að fljúga á leiki er Leiknir Fáskrúðsfirði en liðið spilar í sumar í 1. deild eftir að hafa unnið 2. deildina mjög óvænt í fyrra. Liðinu var spáð falli fyrir tímabilið af þjálfurum liðanna á fótbolta.net.

Brynjar Skúlason, þjálfari Leiknismanna, segir að þetta geti haft mikil áhrif á sitt lið. „Við þurfum að færa leiki og annað út af þessu. Það er auðvitað enn þá langt í þetta og ekki alveg komið á hreint en við vorum búnir að bóka flug fyrir alla útileikina og núna erum við að fá póst um að tímasetningar séu að breytast þannig við erum stundum að lenda klukkutíma fyrir leik og þurfum að bruna beint á völlinn. Spila leikinn og fljúga heim í búningunum ef við ætlum að ná þessu.“

Brynjar segir að þetta komi hart niður á félögunum úti á landi sem hafi sett mikinn pening í starf Flugfélag Íslands sem heitir nú Air Iceland Connect. „Ef þeir færa tímann fram um einn klukkutíma getur það þýtt að við komumst ekki heim eftir leik. Getum ekki flogið fram og til baka samdægurs. Þá þarf að gista í Reykjavík eða keyra heim á bílaleigubílum með tilheyrandi kostnaði.“

Hann segir þó að hann hafi fullan skilning á aðstæðum flugfélagsins. „Þetta gerir allavega ferðaplönin okkar samt erfiðari og dýrari fyrir vikið. Og síðast þegar ég vissi voru ekki að aukast peningarnir í íþróttunum.“ Air Iceland Connect vildi ekki svara síma heldur fá tölvupóst.

Vandamál að koma leikmönnum til landsins

Bæjarráð í Fjarðabyggð samþykkti að leggja nýtt gervigras í Fjarðarbyggðarhöllina fyrir um 40 milljónir króna en grasið var komið til ára sinna. Brynjar fékk að fara inn og prófa og líst vel á. „Það er frábært. Menn eru vanir öðru en það lofaði góðu. Við fengum að fara og sprikla aðeins og þetta verður tilbúið fyrir fyrsta leik.“

Jesús Suarez ætlar að snúa aftur í búningi Leiknis í sumar en hann spilaði með félaginu í þrjú ár og var lykilmaður. Nú þarf bara að koma honum til Fáskrúðsfjarðar frá Valenciu. „Þetta ástand er búið að vera leiðinlegt, eiginlega hundleiðinlegt. En það þarf að fara eftir þeim reglum sem eru settar og ég vona að allir aðrir séu að fara eftir þeim líka. Það er eitt vandamálið í þessu er að koma mannskapnum til landsins. Ég verð með samkeppnishæft lið og ef allt gengur eftir verð ég með fínt lið í höndunum. Það er verið að vinna í þessu og toga í spotta til að þetta verði í lagi í sumar.“

Brynjar Skúlason, þjálfari Leiknismanna. Myndir/Asturglugginn