Sport

Fékk ekki samning hjá Núma en mætir nú Messi

Hannes Þór Halldórsson er skýrt dæmi þess að knattspyrnumenn eigi að stefna hátt og aldrei að gefast upp. Hannes Þór var kominn á botninn þegar hann spyrnti við fótum og klifraði hærra og hærra upp metorðastigann. Nú er hann hins vegar kominn á hátindinn.

Hannes Þór Halldórsson ræðir málin við Heimi Hallgrímsson á æfingu íslenska karlalandsliðsins í knattspyrnu í Kabardinka í Rússlandi. Fréttablaðið/Eyþór

Hannes Þór Halldórsson lék sinn fyrsta A-landsleik í septemberbyrjun árið 2011, en hann var þá 27 ára gamall og átti engan leik að baki fyrir yngri landslið Íslands. Hannes Þór var þá leikmaður KR, en hann hafði gengið til liðs við félagið fyrir keppnistímabilið 2011 og varð tvöfaldur meistari með KR á sínu fyrsta tímabili með Vesturbæjarliðinu.

Hannes Þór var verðlaunaður fyrir frammistöðu sína með KR með sæti í landsliðinu og hefur hann ekki litið til baka síðan. Ef litið er hins vegar til baka á leikmannsferil hans má furðu sæta að þessi geðþekki kvikmyndaleikstjóri sé á leiðinni til Moskvu að koma í veg fyrir það að Lionel Messi, einn besti leikmaður knattspyrnusögunnar, komi boltanum í netmöskva íslenska liðsins á stærsta sviði knattspyrnunnar.

Hannes Þór æfir undir stjórn Guðmundar Hreiðarssonar, markmannsþjálfara íslenska liðsins. Fréttablaðið/Eyþór

Framan af ferlinum glímdi þessi uppaldi Leiknismaður við erfið axlarmeiðsli sem gerðu honum erfitt um vik og komu í veg fyrir að hann kæmist í hæstu hæðir með feril sinn. Þegar Hannes Þór var um tvítugt gekk honum illa að brjóta sér leið inn í uppeldisfélag sitt, Leikni, og leitaði því á önnur mið. Fræg er sagan af því að Númi, sem þá lék í þriðju og neðstu deild íslenskrar knattspyrnu, taldi sig ekki hafa not fyrir íslenska landsliðsmarkvörðinn sem leit við á æfingu hjá liðinu haustið 2004.

Tröppugangur hefur hins vegar verið á ferli hans síðan þá og kemst hann í hæstu tröppu þegar hann mátar sig við bestu knattspyrnumenn heims á stærsta sviði knattspyrnunnar næstu vikurnar. Hannes Þór spilaði með Aftureldingu í 2. deildinni, Stjörnunni í 1. deildinni, Fram í efstu deild og varð svo tvisvar Íslandsmeistari og jafn oft bikarmeistari með KR.

Hannes Þór spjallar við liðsfélaga sína hjá íslenska landsliðinu. Fréttablaðið/Eyþór

Þá hefur Hannes leikið erlendis með norsku liðunum Brann, Sandnes Ulf og Bodø Glimt, hollenska liðinu NEC og danska liðinu Randers þar sem hann leikur þessa stundina. Hann hefur leikið 49 landsleiki, farið í átta liða úrslit á Evrópumóti og tekst nú á við stærstu áskorun sína á ferlinum, að verja skot frá bestu leikmönnum heims með augu heimsins á sér.

Hannes á Guðmundi Hreiðarssyni, markmannsþjálfara íslenska liðsins, mikið að þakka, en þeir unnu saman hjá KR á sínum tíma og tók hann stórstígum framförum undir handleiðslu Guðmundar. Hannes var vissulega öflugur markmaður en hafði sína vankanta.Spyrnutækni, úthlaup og ákvörðunartaka Hannesar bötnuðu til mikilla muna eftir að Guðmundur komst með puttana í hann. Þá jókst trúin á eigin hæfileika og andlegur styrkur hans einnig umtalsvert á tíma hans hjá KR og síðar með íslenska landsliðinu.

Öskubuskuævintýri vekja jafnan gleði og eftirtekt og það má með sanni segja að Hannes sé að skrifa enn einn kafla í ævintýri sitt sem náði lægsta punkti á æfingu með Núma á Tungubakkavelli í Mosfellssveit og nær nú hápunkti þegar hann röltir út á Spartak-leikvanginn við hlið Messi og meðreiðarsveina hans á laugardaginn.

Hannes Þór einbeittur á æfingu með íslenska liðinu. Fréttablaðið/Eyþór

Athugasemdir

Auglýsing
Auglýsing

Tengdar fréttir

Fótbolti

Hann­es: Töp­um van­a­leg­a ekki á heim­a­vell­i

Fótbolti

Rúnar Már: Slæmir kaflar í upphafi hálfleikjanna

Fótbolti

„Íslenska liðið neitaði að gefast upp í kvöld“

Auglýsing

Nýjast

Gylfi Þór: Eitt besta lið í heiminum í að refsa

Ragg­i Sig: „Áttum meir­a skil­ið“

„Ísland gerði okkur afar erfitt fyrir í kvöld“

Al­freð: „Svekkj­and­i að við byrj­uð­um ekki fyrr“

Hamrén: Erum í þessu til að vinna leiki

Freyr: „Þetta tekur tíma“

Auglýsing