Fótbolti

Fann fyrir mikilli pressu en svaraði því með mörkum

Andri Rúnar Bjarnason byrjar tímabilið með Helsingborg af krafti en hann skoraði þrennu um helgina. Hefur hann skorað fimm mörk og lagt upp önnur tvö í fyrstu fimm leikjum tímabilsins. Honum fannst það mikill léttir að ná að brjóta ísinn snemma en sænskir veðbankar töldu hann líklegan til að taka gullskóinn.

Andri Rúnar, hér í leik gegn Val á síðasta ári, byrjar tímabili af krafti í Svíþjóð. Fréttablaðið/Stefán

Bolvíkingurinn Andri Rúnar Bjarnason minnti á sig í umræðunni um hvaða framherjar fara með landsliðinu til Rússlands um helgina er hann skoraði þrennu fyrir Helsingborg í sigri á Frej í Superettan. 

Markakonungur Pepsi-deildarinnar á síðasta ári hefur byrjað tímabilið í Svíþjóð af krafti en hann hefur skorað fimm mörk í fimm leikjum í öllum keppnum ásamt því að leggja upp tvö í fyrsta deildarleik Helsingborg en sænska deildin hófst á dögunum. 

Er þetta fyrsta ár Andra Rúnars í atvinnumennsku eftir félagsskipti frá Grindavík í vetur.

Hefur nýtt tímann vel

Andri Rúnar sem jafnaði markamet íslensku deildarinnar með Grindavík í fyrra tekur undir að fyrstu leikirnir hafi reynst draumi líkastir þegar Fréttablaðið heyrir í honum. 
 
Hafði hann háleit markmið þegar hann kom út en fimm mörk og tvær stoðsendingar voru framar vonum.

„Ég get ekki verið annað en ánægður með fyrstu vikurnar hérna í Svíþjóð, tvær stoðsendingar og þrjú mörk í fyrstu tveimur leikjunum í deildinni. Auðvitað hafði maður háleit markmið en þetta hefur gengið betur en ég þorði að vonast eftir,“ segir Andri og bætir við:

„Ég er í raun enn að koma sjálfum mér á óvart með hvað hægt er að bæta sig mikið á stuttum tíma. Hérna fæ ég svo tækifæri til að æfa aukalega og fæ góða hvíld á milli og það hjálpar manni að bæta sig sem fótboltamaður, ég hef nýtt tímann vel síðustu mánuði.“

Andri fann fyrir pressu er hann kom út en hann heyrði strax ytra að búist var við því að hann yrði markakóngur.

„Það var mikilvægt að ná að skora strax tvö mörk í bikarnum og ég fann það líka þegar ég skoraði fyrsta markið um helgina að það létti á mér. Sjálfstraustið kom með því og ég finn mig betur með hverjum leik,“ segir Andri en veðbankar í Svíþjóð höfðu mikla trú á honum. 

„Sænskir veðbankar settu mig sem langlíklegastan til að vera markahæstur fyrirfram og það skapaði smá pressu.“

Andra finnst jákvætt að leika undir þessari pressu.

„Ég lærði það í fyrra að nýta mér þessa pressu til góðs, reyna að nota hana til að komast lengra. Að mínu mati er betra að hafa pressu á sér til að kalla fram það besta í manni.“

Líður vel í Svíþjóð

Andri samdi við eitt af stærstu liðum Svíþjóðar en Helsingsborg er í Superettan-deildinni, næstefstu deildinni í Svíþjóð. Hann finnur fyrir miklum metnaði hjá félaginu til að koma því aftur í fremstu röð og kann vel við lífið í Svíþjóð.

„Það tók mig ekki nema nokkrar mínútur að sjá hversu stór klúbbur þetta var þegar ég skoðaði aðstæðurnar í haust. Metnaðurinn er mikill hjá félaginu og það er búið að sækja leikmenn sem hafa gert það gott í efstu deild. Gæðin á æfingunum eru mikil og það tók mig 2-3 vikur að venjast hraðanum. Eftir það hef ég náð að komast betur í takt við hraðann á æfingunum og náð að bæta mig heilan helling síðan ég kom hingað út til Svíþjóðar.“

Yrði draumur að fara á HM

Andri Rúnar lék fyrstu landsleiki sína gegn Indónesíu í janúar og skoraði í þeim eitt mark. Hann dreymir um að komast á HM eins og alla aðra knattspyrnuleikmenn frá Íslandi. 

Hann segist þó ekki hugsa út í það dagsdaglega.

„Það er náttúrulega draumur allra að vera hluti af þessum hóp en ég reyni að hugsa ekki mikið út í hvort ég verði í hópnum. Ég stjórna ekki valinu, ég get bara stýrt því hvernig ég spila og hvort ég verði tilbúinn ef ég verð valinn.“

Andri kveðst að sjálfsögðu tilbúinn ef kallið kemur.

„Ég verð tilbúinn ef kallið kemur en þetta er ekki mitt að ákveða. Landsliðsþjálfararnir velja sterkasta hópinn hverju sinni og þeir taka ákvörðunina.“

Athugasemdir

Auglýsing
Auglýsing

Tengdar fréttir

Fótbolti

Barcelona vann bikarinn með stæl

Fótbolti

Er tími HSV í efstu deild Þýskalands kominn á enda?

Fótbolti

Rannsaka starfsemi í akedemíu Marcelo

Auglýsing

Nýjast

Íslenski boltinn

„Okkur langar að færa okkur upp um eitt þrep"

Íslenski boltinn

Spá Fréttablaðsins: KA hafnar í 6. sæti

Enski boltinn

Aron skaut Cardiff upp í annað sætið

Enski boltinn

Man. Utd getur bjargað tímabilinu með bikar

Körfubolti

Valur jafnaði metin gegn Haukum

Handbolti

ÍBV fer með þriggja marka forskot til Rúmeníu

Auglýsing