„Það er vissulega komin mikil eftirvænting þó að maður sé enn auðvitað líka með hugann við síðasta leikinn í Bestu deildinni fyrir landsleikina. Þetta varð strax áþreifanlegra þegar Steini kynnti hópinn og við fengum að vita hvernig þetta myndi líta út,“ segir Sandra Sigurðardóttir, markvörður íslenska kvennalandsliðsins, aðspurð út í Evrópumótið fram undan.

Sandra er hluti af 23 manna hópi Íslands sem var kynntur á dögunum, en hún er ein þriggja leikmanna sem eru að fara á sitt fjórða stórmót. Í ár eru sautján ár liðin síðan Sandra lék fyrsta leik sinn fyrir íslenska landsliðið og hefur hún þurft að bíða eftir stöðu aðalmarkvarðar. Sandra hefur fyrir vikið ekki enn komið við sögu á stórmóti en er staðráðin í að breyta því í sumar.

„Aðdragandinn er vissulega öðruvísi því ég fer inn í þetta mót í öðru nýju hlutverki. Ég fer ekkert leynt með það að markmið mitt og áætlun er að spila alla leikina á þessu móti. Ég veit af samkeppninni en ég ætla um leið að sýna mig og sanna því ég veit að ég get staðið vaktina vel,“ segir Sandra, aðspurð hvort að það sé eftirvænting hjá henni yfir að fyrsti leikurinn á stórmóti sé í sjónmáli.

Hún heldur áfram: „Ég vissi í aðdraganda fyrstu tveggja mótanna að ég yrði varamaður. Mér fannst ég eiga möguleika á sætinu fyrir síðasta EM, en þetta snýst auðvitað líka um hvað þjálfarinn kýs að gera.“

Sandra, sem er leikjahæsti leikmaður efstu deildar kvenna frá upphafi, tekur undir að það væri rós í hnappagatið að hafa spilað á stórmóti þegar hanskarnir rata upp í hilluna einn daginn.

„Það yrði stór áfangi á ferlinum. Þetta er eitthvað sem mig hefur dreymt um, að koma fram fyrir hönd Íslands á stórmóti. Þegar ég legg hanskana á hilluna, hvenær sem það verður, verð ég auðvitað stolt af ferlinum, en þetta yrði skemmtileg viðbót.“

Mótið er með stærra sniði heldur en áður og segist Sandra finna mun.

„Þetta er öðruvísi. Umfangið er annað, stærðin á mótinu er meiri, aukin athygli, sem er til hins betra. Það hefur margt breyst.“

Markvörðurinn tók í sama streng og þjálfari liðsins þegar hún var spurð út í markmið hópsins.

„Eins og Þorsteinn kom inn á á blaðamannafundinum þegar hópurinn var kynntur, erum við ekki búin að velta okkur upp úr þessu í síðustu verkefnum. Við eigum eftir að fara yfir markmiðin okkar en það er ekkert launungarmál að við erum ekki að fara bara til að vera með. Franska liðið er mjög hátt skrifað og verður verðugt verkefni, en það er allt hægt í fótbolta. Með trú og baráttu að vopni eru okkur allir vegir færir,“ segir Sandra, aðspurð um mótherja Íslands.

Sandra fór fögrum orðum um yngri leikmenn liðsins, þegar umræðan barst að leikmönnum sem voru nokkrar á leikskólaaldri þegar hún lék fyrsta leik sinn fyrir Íslands hönd. Af 23 leikmönnum liðsins eru ellefu að fara á sitt fyrsta stórmót.

„Maður fylgist með þeim af mikilli aðdáun. Þær eru búnar að sýna og sanna hvað býr í þeim og þær eiga enn nóg inni. Þær eru allar með frábært hugarfar, metnaðargjarnar, baráttuglaðar og mikil gæði. Það eru svo mikil gæði í yngri kynslóðunum sem eru að koma upp núna enda þjálfunin og aðstaðan allt önnur en ég kynntist,“ segir Sandra glettin og heldur áfram:

„Ég byrjaði minn knattspyrnuferil á malarvelli, eitthvað sem margar af yngri leikmönnunum hafa sennilega aldrei kynnst,“ segir hún létt að lokum.