Myndbandsdómgæsla (e. Video assistant referee) eða VAR eins og hún er kölluð, verður prófuð í miðdegisleikjum laugardagsins í ensku úrvalsdeildinni í fyrsta sinn án þess þó að dómarinn njóti góðs af því.

Var notast við myndbandsdómgæslu í fyrsta sinn á Englandi í enska deildarbikarnum og bikarnum í fyrra þegar leikir fóru fram á heimavöllum liða í efstu deild.

Þá var kerfið prófað á stökum leikjum í ensku úrvalsdeildinni í fyrra líkt og um helgina. 

Verður þetta í fyrsta sinn sem kerfið er notað á fleiri en einum velli á sama tíma á Englandi.

Á fundi liðanna í vor var því hafnað að innleiða myndbandsdómgæslu í efstu deild fyrir þetta tímabil.

Var mikil ánægja með myndbandsdómgæslu á HM í sumar. 

Þjálfarar liða í þýsku og ítölsku deildinni hafa ekki verið jafn ánægðir með notkun þess.