Enski boltinn

Engar afsakanir, herr Klopp

Liverpool styrkti leikmannahópinn hvað mest í sumar og mætir með sterkt lið sem er tilbúið að gera atlögu að titlum. Stuðningsmenn félagsins hafa beðið í 28 ár eftir þeim stærsta á Englandi.

Það er gríðarlega mikilvægt fyrir Liverpool að Naby Keita og Mohamed Salah nái vel saman í vetur. Miklar væntingar eru gerðar til Sal­ah eftir að hann bætti markametið í ensku úrvalsdeildinni í vor en varnarmenn munu hafa góðar gætur á honum. Fréttablaðið/Getty

Síðustu áratugir hafa verið erfiðir stuðningsmönnum Liverpool en aðeins einn titill hefur unnist undanfarin tólf ár. Eru stuðningsmenn félagsins þyrstir í að sjá félagið fara að vinna titla og þar er einn efstur á lista. Enski meistaratitillinn. Titill sem Liverpool hefur verið að eltast við í 28 ár og komist nálægt því að landa en þegar á hólminn er komið hefur tækifærið runnið úr greipum þeirra.

Jürgen Klopp, knattspyrnustjóri Liverpool, hefur fengið nokkuð greiðan aðgang að fjárhirslum félagsins á þessu ári og er kominn tími á að hann fari að skila titlum til Bítlaborgarinnar.

Klopp er að hefja sitt þriðja heila tímabil hjá félaginu og nálgast þrjú ár sem knattspyrnustjóri Liverpool eftir að hafa tekið við af Brendan Rodgers haustið 2015. Með Klopp komu miklar væntingar enda hafði honum áður tekist að stýra Dortmund til sigurs í þýsku deildinni tvö ár í röð og í úrslit Meistaradeildar Evrópu þrátt fyrir að hafa aðeins brotabrot af fjármagninu sem lið á borð við Bayern München hafði.

Klopp hefur ekki tekist að vinna bikar fyrstu þrjú árin hjá Liverpool. Fréttablaðið/Getty

Sömu vandræði héldu áfram

Tókst honum að kaupa leikmenn og gera þá að stjörnum á sama tíma og liðið hans spilaði stórskemmtilegan fótbolta á leið sinni í átt að tveimur meistaratitlum og einum bikarmeistaratitli.

Þrátt fyrir að honum hafi tekist að láta Liverpool spila skemmtilegan fótbolta voru sömu vandamál að hrjá liðið og hafa gert allt frá því að Rafa Benitez yfirgaf félagið árið 2010. Allan stöðugleika skorti í varnarleikinn og þar fyrir aftan voru markmenn sem voru alltaf líklegir til að gera afdrifarík mistök líkt og sást bersýnilega í úrslitum Meistaradeildar Evrópu í vor.

Setti Liverpool ný viðmið þegar kom að kaupum á varnarmanni í janúar síðastliðnum þegar félagið greiddi stórfé, 75 milljónir punda, fyrir Virgil Van Dijk, hollenska miðvörðinn frá Southampton. Klopp einblíndi á að fá Van Dijk og engan annan og fékk það í gegn en hann kom með meiri ró í varnarleik liðsins.

Alisson á leysa markvarðavandamál Liverpool. Fréttablaðið/Getty

Stefnan sett á titilinn

Í sumar fékk hann aftur að styrkja leikmannahópinn og sækja leikmenn sem hann var með efsta á óskalista. Ekki þurfti að sætta sig við plan-B þetta árið. Aftur fékk hann að kaupa dýrasta mann heimsins í sinni stöðu, brasilíska markvörðinn Alisson Becker þótt Chelsea hafi bætt það met skömmu síðar. 

Þar að auki komu varnarsinnaði miðjumaðurinn Fabinho og Naby Keita inn fyrir tæpar hundrað milljónir punda samanlagt. Bætti hann að lokum aukavopni við sóknarleikinn, Xherdan Shaqiri, á góðu verði frá Stoke. Spurningin er hvort honum takist að fá meiri stöðugleika út úr svissneska kantmanninum sem hefur átt kaflaskiptan feril.

Í heildina hefur Klopp eytt rúmum 230 milljónum punda til að styrkja leikmannahópinn á þessu ári og fengið fjóra heimsklassa leikmenn í sínar raðir. Salan á Philippe Coutinho til Barcelona fyrir 140 milljónir lagar ársreikninginn en það er ekkert launungarmál að búið er að styrkja hópinn til að gera atlögu að meistaratitlinum.

Liverpool með þennan hóp ætti að teljast tilbúið í baráttuna um titilinn við ríkjandi meistara Manchester City og hvaða félag sem er sem blandar sér í baráttuna í ár. Í ár ætti Liverpool ekki að hafa neinar afsakanir, það er kominn tími til að setja nýja bikara upp í hillurnar á Anfield sem hafa safnað ryki í of langan tíma að mati stuðningsmannanna.

Þessi grein birtist í sérblaði um enska boltann sem fylgdi Fréttablaðinu í dag.

Athugasemdir

Auglýsing
Auglýsing

Tengdar fréttir

Enski boltinn

Özil stórkostlegur í sigri Arsenal á Newcastle

Enski boltinn

Jose Mourinho sleppur við kæru

Fótbolti

Sér alltaf nokkra leiki fram í tímann

Auglýsing

Nýjast

„Fann það strax að við gætum unnið saman“

Andri Rúnar og félagar fara upp með sigri í kvöld

„Þakklátur fyrir þetta tækifæri sem KSÍ veitir mér“

Valskonur söxuðu á forskot Fram á toppnum

Glódís og stöllur einum sigri frá meistaratitlinum

„Allt til staðar til að gera góða hluti saman næstu árin“

Auglýsing