Nú rétt í þessu lauk keppni í úrslitum Heimstúrsins í keilu 2019 en þar átti Arnar Davíð Jónsson, keiluspilari úr KFR, boð um þátttöku sem efsti maður á Evrópulistanum.

Í morgun var spiluð forkeppni þeirra sex sem kepptu til úrslita og endaði Arnar Davíð í öðru sæti þar á eftir Englendingnum Dominic Barrett en þeir áttust við í úrslitum Kuwait International Open-mótinu í gær þar sem Barrett vann með einum pinna.

Arnar Davið lék fyrst við Sean Rash frá Bandaríkjunum sem varð í þriðja sæti en Rash á fjölmarga PBA titla í safni sínu. Arnar Davíð sigraði þann leik örugglega með 289 pinnum gegn 223.

Það fór því svo að þeir félagar, Arnar Davíð og Barrett, að mættust aftur í úrslitum í dag. Arnar Davið byrjaði mjög vel í úrslitaleiknum og felldi út í fimmta ramma. Þá fór þó aðeins að síga á ógæfuhliðina hjá Arnari Davíð og Barrett seig framúr og hafði sigur að lokum með 276 pinnum gegn 232. Barrett er því World Bowling Tour meistari 2019.

Þessi árangur Arnars Davíðs er frábær, það er að enda í öðru sæti bæði í Kuwait open International-mótinu og svo öðru sæti í úrslitum Heimstúrsins.

Arnar Davíð heldur í fyrramálið til Álaborgar í Danmörku þar sem fram fer síðasta mótið á Evróputúrnum í ár. Þar freistar hann þess að halda efsta sætinu á Evrópulistanum og verða þar með fyrsti íslenski keilarinn til að sigra Evrópumótaröð í keilu.