Elísabet Rut Rúnarsdóttir, úr ÍR, bætti í gær Íslandsmetið í sleggjukasti þegar hún kastaði 62,16 metra á kastmóti UMSB á Skallagrímsvelli í Borgarnesi.

Elísabet Rut er aðeins 16 ára gömul og bætti hún því um leið aldursflokkamet 16-17 ára, 18-19 ára og 20-22 ára. Fyrra metið var 61,77 metrar sem Vigdís Jónsdóttir setti árið 2017.

Elísabet Rut á einnig lengsta kast ársins í heiminum í dag í flokki stúlkna 16-17 ára með 3 kg sleggju.

Það er 71,19 metrar og náði hún þeim árangri 5. apríl. Íslandsmet hennar í dag var hins vegar með 4 kg sleggju sem kastað er með í fullorðinsflokki.