Gary Lineker, umsjónarmanni Match of the Day á BBC og fyrrum atvinnu- og landsliðsmanni Englands í knattspyrnu, verður ekki refsað af BBC fyrir að hafa gagnrýnt stefnu breskra stjórnvalda í málefnu flóttafólks á samfélagsmiðlinum Twitter á dögunum.
Málið hefur vakið töluverða athygli á Bretlandseyjum enda er Lineker, sem var á sínum tíma afar frambærilegur knattspyrnumaður og markahrókur mikill, andlit íþróttaumfjöllunar BBC.
Í færslu, sem að Lineker birti á Twitter, deildi hann myndbandi þar sem að innanríkisráðherra Bretlands, Suella Braverman, kynnti til leiks frumvarp sitt er sneri að „ólöglegum fólksflutningum“ yfir Ermarsundið.
Í myndbandinu var gefið til kynna að breska ríkið væri að eyða næstum 7 milljónum punda á dag í gistingu fyrir það fólk sem kæmi ólöglega yfir Ermarsundið til landsins. Frumvarpinu er ætlað að gefa breska ríkinu heimild til þess að hneppa þetta fólk í varðhald við komuna til landsins og senda það til baka þaðan sem það kom, ef það er talið öruggt land.
„Guð minn almáttugur, þetta er skelfilegt,“ skrifaði Lineker í færslunni þar sem hann deildi myndbandi innanríkisráðherrans og sagði frumvarpið fela í sér ómælda grimmd.
„Hér er ekkert stórt innstreymi flóttafólks,“ bætti Lineker við í færslu á Twitter. „Við tökum við miklu færri flóttamönnum en allar aðrar stærri Evrópuþjóðir. Þetta er bara ótrúlega grimm stefna sem er beint að viðkvæmasta fólkinu, stefna sem var notuð í Þýskalandi fyrir nokkrum áratugum síðan. Og svo er það ég sem er ekki í lagi?“
Í kjölfarið tóku þingmenn Íhaldsflokksins í Bretlandi á rás og kröfðust þess að Lineker yrði sagt upp störfum. Nú er hins vegar ljóst að afleiðingarnar fyrir hann verða ekki meira en smá tiltal.
