Formúlu 1 lið Mercedes mun ekki leita að sökudólgum vegna vondrar byrjunar liðsins á yfirstandandi Formúlu 1 tímabili. Frá þessu er greint í yfirlýsingu liðsins til stuðningsmanna sinna. Mercedes bindur vonir við uppfærslur á bíl sínum en fram undan er önnur keppnishelgi tímabilsins.
Mercedes virðist langt á eftir keppinautum sínum í ljósi úrslita fyrstu keppnishelgarinnar í Barein þar sem Lewis Hamilton endaði í 5. sæti og George Russell í því þriðja. Í kjölfar keppnishelgarinnar gagnrýndi Lewis Hamilton, sjöfaldi heimsmeistarinn, liðið og sagðist hafa viðrað áhyggjur sínar varðandi bíl Mercedes fyrir löngu síðan.
Fárviðrið í kringum Mercedes eftir fyrstu keppnishelgina hefur verið mikið, liðið hefur nú séð sig tilneytt til að gefa út yfirlýsingu til stuðningsmanna sinna þar sem segir að vonir séu bundnar við bjartari tíma.
Daily Mail hefur fyrir því heimildir að krísufundur hafi verið boðaður í herbúðum liðsins í síðustu viku, tæknistjóranum Mike Eliott hafi þar verið gefnir afarkostir.
Í yfirlýsingu Mercedes segist liðið hins vegar ekki ætla að leita að sökudólgum.
„Niðurstaða keppnishelgarinnar í Barein sveið. Hún særði okkur öll vegna þess að við förum inn í hvert einasta tímabil með það að markmiði að berjast um heimsmeistaratitil. Þetta særði liðsmenn okkar sem hafa unnið hörðum höndum að því að þróa bílinn sem hefur ekki staðist væntingar hingað til.“
Það sem blasi við liðinu núna er staða sem engin hafi viljað að upp myndi koma.
„En þetta er raunveruleikinn.“
Nú þurfi að horfast í augu við hann og finna leiðir til þess að taka skref fram á við.
„Við munum ekki panikka eða taka ákvarðanir í fljótfærni. Í því kastljósi sem Formúla 1 er, tekur það ekki langan tíma fyrir fólk að benda á mögulega sökudólga. Þið hins vegar þekkið okkur betur en það.“
Nú þegar sé farin af stað þróun á uppfærslum fyrir bíl liðsins fyrir komandi keppnishelgar.
