Sport

Ekki áhyggjur af nokkrum hlut

Undirbúningur þátttöku Íslands í Heimsmeistaramótinu í fótbolta 2018 hefur staðið yfir í tæp tvö ár. Klara Bjartmarz, framkvæmdastjóri KSÍ, er fararstjóri liðsins.

Klara segir að undirbúningur fyrir HM hafi gengið mjög vel hér heima.

Undirbúningurinn hófst í raun áður en við unnum sæti á HM. Það er komið eitt og hálft ár síðan við völdum okkur hótel. Þegar tryggt var að liðið færi út fór allt á fullt. Eitt af því fyrsta sem við gerðum var að ráða inn fleira starfsfólk til að halda utan um skipulagið allt. Svo hófst vinnan og verkefnin hafa verið tekin fyrir eitt af öðru,“ segir Klara Bjartmarz, framkvæmdastjóri KSÍ og fararstjóri íslenska landsliðsins í Rússlandi, en hún gaf sér nokkrar mínútur í spjall áður en hópurinn lagði af stað til Rússlands á laugardaginn.

Þá var undirbúningurinn á lokasprettinum og óteljandi handtök og margra mánaða vinna að skila sér.

„Því er ekki að neita að þetta er mun flóknara verkefni en þegar liðið fór á EM í Frakklandi. Meginskipulagningin fer fram á skrifstofunni og þar erum við með fjölmiðladeild, landsliðsdeild og miðadeild. Þetta er tíu manna hópur sem heldur utan um pappírshlið mála og nagar blýantana. Svo kemur fjöldi fólks að öðrum þáttum sem tengjast liðinu sjálfu eins og þjálfarar, sjúkraþjálfarar og margir fleiri. Farnar voru tvær ferðir þvers og kruss um Rússland til að skoða hótel og eftir að það var klárt hafa tvær vettvangsferðir verið farnar. Þá fór hópur út um daginn á undan landsliðinu sjálfu til að undirbúa komu þess út,“ segir Klara.

Samstarfið við rússneska kollega hafi gengið vel.

„Við óskuðum eftir ákveðinni uppfærslu á hótelinu og brugðist var vel við öllum okkar kröfum. Við erum með langa tékklista og tékklista yfir tékklistana og þeim boxum sem eftir á að tikka í fækkar hratt. Þetta er allt að smella. Helsta vandamálið sem við þurftum að kljást við var að fá nógu gott þráðlaust net. En gott netsamband er nauðsynlegt, bæði fyrir liðsmenn og þjálfara og alla sem að þessu standa,“ segir Klara.

Ekki væsi því um íslenska landsliðið og passað verði vel upp á góðan mat og drykk.

„Nú fara tveir kokkar með okkur út sem er breyting frá því á EM. Við verðum með okkar eigin eldhús og fáum aðstöðu á hótelinu til þess. Kokkarnir kaupa inn og sjá alfarið um að elda ofan í liðið. Að vissu leyti er þetta hagkvæmara og auðveldara fyrir okkur, að stjórna því hvað við fáum. Í Rússlandi er ekkert að hráefninu en matreiðslan er kannski önnur. En við verðum með þaulreynda kokka með okkur. Leikmenn borða oft og þurfa mikla og góða næringu,“ segir Klara.

Hópurinn heldur þó ekki einungis utan um mál landsliðsins heldur þjónustar fjölskyldur leikmanna og aðstoðar einnig stuðningsmenn liðsins.

„Á hverjum leikstað erum við með fjögurra manna sveit frá okkur sem mætir á undan liðinu á leikstaði og verður til aðstoðar, hvort sem um ræðir fjölskyldur leikmanna eða almenna stuðningsmenn landsliðsins. Þá verður okkar besta manneskja í miðamálum úti allan tímann til taks,“ segir Klara. Greinilega er því vel búið um hnútana enda segir hún engan taugatitring að finna í undirbúningshópnum.

„Ég hef ekki miklar áhyggjur af nokkrum hlut. Við erum mjög vel undirbúin og skipulögð og mjög vel mönnuð. Við erum líka með góðan stuðning af skrifstofunni heima meðan á keppni stendur. Auðvitað mun eitthvað koma upp og örugglega á eftir að koma í ljós að eitthvað gleymdist en við erum reiðubúin að bregðast við öllu sem kemur upp þegar það kemur.“

Athugasemdir

Auglýsing
Auglýsing

Tengdar fréttir

Fótbolti

Hann­es: Töp­um van­a­leg­a ekki á heim­a­vell­i

Fótbolti

Rúnar Már: Slæmir kaflar í upphafi hálfleikjanna

Fótbolti

„Íslenska liðið neitaði að gefast upp í kvöld“

Auglýsing

Nýjast

Gylfi Þór: Eitt besta lið í heiminum í að refsa

Ragg­i Sig: „Áttum meir­a skil­ið“

„Ísland gerði okkur afar erfitt fyrir í kvöld“

Al­freð: „Svekkj­and­i að við byrj­uð­um ekki fyrr“

Hamrén: Erum í þessu til að vinna leiki

Freyr: „Þetta tekur tíma“

Auglýsing