Wojciech Szczesny hefur heldur betur átt gott HM með pólska lands­liðinu í knatt­spyrnu sem hefur nú tryggt sér sæti í 16-liða úr­slitum HM í Katar. Szczesny hefur stigið upp á stórum stundum og meðal annars varið tvær víta­spyrnur til þessa á mótinu, ein þeirra kom frá argentínsku knatt­spyrnu­goð­sögninni Lionel Messi.

Tví­sýnt var hvort að Szczesny myndi ná að upp­fylla draum sinn um að verða at­vinnu­maður í knatt­spyrnu eftir furðu­legt slys sem átti sér stað þegar að hann var á styrktar­æfingu. Slys sem endaði með því að bein í báðum hand­leggjum Szczesny brotnuðu.

The Sun greinir frá en Szczesny, sem var 17 ára á þessum tíma, var stað­ráðinn í að láta þetta ekki binda enda á sinn feril. Flestir knatt­spyrnu­á­huga­menn vita hvernig ferill hans hefur þróast síðan þá.

Szczesny hefur verið á mála hjá stór­liðum á borð við Arsenal og Juventus og nú er hann lykil­leik­maður í pólska lands­liðinu.