Íslenska karlalandsliðið í bandý leikur um næstu helgi sína fyrstu heimaleiki í undirbúningi sínum fyrir undankeppni HM sem haldin verður í Danmörku í janúar. Leikið verður við Bandaríkjamenn í íþróttahúsinu í Digranesi laugardaginn 9. nóvember klukkan 19.00 og sunnudaginn 10. nóvember klukkan 15.00. Frítt er inn á leikina.

Bandý er mjög ung íþrótt hér á landi en Atli Þór Hannesson, leikmaður íslenska landsliðsins og meðlimur í bandýnefnd ÍSÍ, segir að í þessum leikjum muni leikmenn spila sem koma upp úr yngriflokkastarfi sem starfrækt er hér heima.

Á Íslandi heldur HK úti bandýdeild fyrir krakka frá 10 ára aldri af báðum kynjum upp í meistaraflokk auk þess sem nokkur lið víðsvegar á landinu spila bandý, þar á meðal Ungmennafélagið Samherjar á Hrafnagili. Fyrir áhugasama býður bandýdeild HK áhugasömum að prófa íþróttina endurgjaldslaust á mánudagskvöldum í Digranesi.

Íslenska karlalandsliðið í bandý leikur tvo æfingaleiki við Bandaríkin um komandi helgi en báðir leikirnir fara fram í íþróttahúsinu að Digranesi. MYND/IFF

„Þetta er í fyrsta skipti sem við höfum á að skipa leikmönnum í landsliði Íslands í bandý sem hafa alist upp í yngriflokkastarfi á íslenskri grund. Þess utan erum við með leikreynda leikmenn sem leika hér heima og svo hálfatvinnumenn sem spila í Svíþjóð. Það er mjög gefandi að sjá leikmenn sem ég hef fylgst með síðan þeir voru ungir pjakkar vera komna í landsliðið,“ segir Atli í samtali við Fréttablaðið.

„Það er mjög sterkt fyrir okkur að vera með tengsl við Svíþjóð sem er ein sterkasta þjóð heims í bandý og er sigursælasta þjóðin á heimsmeistaramótinu í greininni. Finnland er reyndar ríkjandi meistari, en auk þessara þjóða standa Sviss og Tékkland fremst í bandý á heimsvísu. Íþróttin er sífellt að vaxa hér heima og liðum sem æfa skipulega og senda öflug lið til leiks í meistaraflokki fjölgar með hverju árinu,“ segir hann enn fremur.

„Þá eigum við leikmenn sem spila á hinum Norðurlöndunum. Okkar skærasta stjarna er Andreas Stefansson en hann er einn færasti leikmaður sænsku úrvalsdeildarinnar. Við erum mjög spennt fyrir þessum leikjum og teljum okkur vera með nokkuð sterkt lið og það verður gaman að miða okkur við Bandaríkjamennina,“ segir Atli um komandi verkefni íslenska liðsins.

„Það er í mörg horn að líta fyrir okkur sem stöndum að þessu en það er bara skemmtilegt. Við erum að klára að binda alla lausa enda og nú getum við farið að einbeita okkur alfarið að bandýinu á síðustu dögunum fyrir leikina. Vonandi náum við fram góðri frammistöðu og skemmtilegum leikjum. Það væri gaman að sjá fólk mæta í Digranesið um helgina og sjá afrakstur af mikilli vinnu okkar,“ segir þessi öflugi bandýmaður.