KSÍ sendi frá sér tilkynningu rétt í þessu þar sem fram kom að sambandið hefði komist að samkomulagi við Eið Smára Guðjohnsen um starfslok hans sem annar af landsliðsþjálfurunum.

Eiður lætur af störfum þann 1. desember næstkomandi, tæpu ári eftir að var ráðinn sem aðstoðarþjálfari Arnars Þórs Viðarssonar hjá karlalandsliðinu.

Eiður lék á sínum tíma 88 leiki og deilir markameti karlalandsliðsins. Í þjálfarastarfinu kom hann að þrettán leikjum.

Í tilkynningu KSÍ sem má lesa hér fyrir neðan er Eiði þakkað fyrir störf sín.

Eiður Smári lætur af störfum

Stjórn KSÍ og Eiður Smári Guðjohnsen hafa komist að samkomulagi um starfslok hans sem aðstoðarþjálfari A landsliðs karla. Samkomulagið snýr að því að virkjað hefur verið endurskoðunarákvæði í ráðningasamningi sem gerður var milli hans og KSÍ og mun hann láta af störfum 1. desember næstkomandi.

Eiður Smári, sem lék á sínum tíma 88 A-landsleiki og skoraði í þeim 26 mörk, hefur verið í þjálfarateymi liðsins frá desember 2020 og starfað með því í öllum leikjum ársins 2021 – þremur vináttuleikjum og 10 leikjum í undankeppni HM 2022.

Samkomulag um starfslok mín voru tekin með hagsmuni mína, landsliðsins og KSÍ að leiðarljósi. Ég vil þakka öllum innan sambandsins fyrir frábært samstarf undanfarið ár. Síðasta ár hefur verið mjög krefjandi bæði innan vallar sem og utan bæði fyrir mig persónulega sem og sambandið. Áfram Ísland!“ segir Eiður Smári.

KSÍ þakkar Eiði Smára fyrir hans störf og óskar honum velfarnaðar í framtíðinni.