Tómas Þór Þórðarson og Davíð Þór Viðarsson settust í settið í Íþróttavikunni með Benna Bó sem sýnd er á föstudögum á Hringbraut.

Eitt af því sem var til umræðu í þættinum var mæting á knattspyrnuleiki hér heima, en hún hefur ekki þótt nógu góð í sumar.

Mörg félög hafa bætt umgjörð sína í kringum leiki. Tómas er farinn að efast um að það sé nóg.

„Ég er farinn að halda að þetta snúist ekki lengur um þetta. Auðvitað megum við ekki missa dampinn í þessu og helst bæta við. En við grunar að þetta séu tölur sem við þurfum að stóru leyti að sætta okkur við,“ segir hann.

„Það tengist ekkert gæðum fótboltans eða hversu gaman það er að fara. Það er bara allt annað sem er í boði. Kannski með styttingu vinnuvikunnar er meira svigrúm fyrir fjölskyldur að fara.

Við megum ekki taka þeim áhorfendum sem eru að koma sem sjálfsögðum hlut og leyfa þessu að detta niður. Auðvitað eigum við að reyna að halda áfram að fá fleiri á leiki og gera meira, sérstaklega úr stórleikjum. En það er bara allt í heiminum í boði.“

Nú hefur Bestu deild karla verið skipt upp í tvo hluta. Töluvert meiri spenna er í neðri hlutanum.

„Þetta ætti að geta stuðlað að hærri tölum í lokaumferðunum, maður vonar það,“ segir Davíð.